ഹാസ്യതാരം ഭാരതി സിങ്ങിനെയും ഭർത്താവ് ഹർഷ് ലിംബാചിയ്യയെയും എൻസിബി കസ്റ്റഡിയിലെടുത്തു
മുംബൈ: ലഹരി ഇടപാടുമായി ബന്ധപ്പെട്ട കേസിൽ ഹാസ്യതാരം ഭാരതി സിങ്ങിനെയും ഭർത്താവ് ഹർഷ് ലിംബാചിയ്യയെയും നർക്കോട്ടിക്സ് കൺട്രോൾ ബ്യൂറോ (എൻസിബി) കസ്റ്റഡിയിലെടുത്തു. ലഹരി ഇടപാട് കേസിൽ ഇവരുടെ മുംബൈയിലെ വീട്ടിൽ പരിശോധന നടത്തിയതിനു പിന്നാലെയാണ് ഇരുവരെയും കസ്റ്റഡിയിലെടുത്തത്.
ലഹരി വസ്തുക്കൾ കൈവശം വെച്ചതിന്റെ പേരിൽ ചോദ്യംചെയ്യലിനാണ് ഇവരെ കസ്റ്റഡിയിൽ എടുത്തതെന്ന് എൻസിബി മേഖലാ ഡയറക്ടർ സമീർ വാങ്കഡേ പറഞ്ഞു. ഇവരുടെ വീട്ടിൽ നടത്തിയ പരിശോധനയിൽ ലഹരിവസ്തുക്കൾ പിടിച്ചെടുത്തതായും അദ്ദേഹം വ്യക്തമാക്കി. ഏതുതരത്തിലുള്ള ലഹരിവസ്തുക്കളാണ് ഇവരിൽനിന്ന് പിടിച്ചെടുത്തതെന്ന് വ്യക്തമാക്കിയിട്ടില്ല.
