ഉജ്ജ്വലബാല്യം പുരസ്കാരം: അപേക്ഷ ക്ഷണിച്ചു
വനിത ശിശുവികസന വകുപ്പിന്റെ സംയോജിത ശിശു സംരക്ഷണ പദ്ധതിയുടെ ഭാഗമായി ആറിനും 18നും ഇടയില് പ്രായമുള്ള വിവിധ മേഖലകളില് കഴിവ് തെളിയിച്ച കുട്ടികള്ക്കുള്ള ഉജ്ജ്വല ബാല്യം പുരസ്കാരത്തിന് അപേക്ഷ ക്ഷണിച്ചു. കല, കായികം, സാഹിത്യം, ശാസ്ത്രം, സാമൂഹികം, പരിസ്ഥിതി സംരക്ഷണം, ഐടി, കൃഷി, മാലിന്യ സംസ്കരണം, ജീവകാരുണ്യ പ്രവര്ത്തനം, ക്രാഫ്റ്റ്, ശില്പ നിര്മ്മാണം, അസാമാന്യ ധീരതയോടെ ചെയ്ത പ്രവൃത്തി എന്നീ മേഖലകളില് കഴിവ് തെളിയിച്ച കുട്ടികള്ക്കാണ് പുരസ്കാരം. ജില്ലയില് നാല് കുട്ടികള് എന്ന രീതിയിലാണ് പുരസ്കാരം നല്കുക. ഭിന്നശേഷി വിഭാഗത്തിലെ കുട്ടികളെ പ്രത്യേക വിഭാഗമായി പരിഗണിക്കും. അപേക്ഷകര് ബന്ധപ്പെട്ട മേഖലയില് ലഭിച്ചിട്ടുള്ള സര്ട്ടിഫിക്കറ്റുകള്, പ്രശസ്തി പത്രങ്ങള്, കുട്ടികളുടെ പേരില് പ്രസിദ്ധീകരിച്ച പുസ്തകമുണ്ടെങ്കില് അതിന്റെ പകര്പ്പ്, കലാപ്രകടനങ്ങള് ഉള്ക്കൊള്ളുന്ന സിഡി/പെന്ഡ്രൈവ്, പത്രക്കുറിപ്പുകള് എന്നിവ അപേക്ഷയോടൊപ്പം നല്കണം. കേന്ദ്ര സര്ക്കാരിന്റെ നാഷണല് ചൈല്ഡ് അവാര്ഡ് ഫോര് എക്സെപ്ഷണല് അച്ചീവ്മെന്റ് കരസ്ഥമാക്കിയ കുട്ടികളെ സംസ്ഥാനതല അവാര്ഡിന് പരിഗണിക്കുന്നതല്ല. 2020ല് പ്രാഗത്ഭ്യം ലഭിച്ച കുട്ടികളായിരിക്കണം. ഒരു തവണ ഉജ്ജ്വല ബാല്യം പുരസ്കാരം ലഭിച്ചവര് അപേക്ഷിക്കേണ്ടതില്ല. അവാര്ഡ് നവംബര് 14 ശിശുദിനത്തില് വിതരണം ചെയ്യും. അപേക്ഷ ഒക്ടോബര് 30ന് വൈകിട്ട് അഞ്ചു മണിക്കകം ജില്ലാ ചൈല്ഡ് പ്രൊട്ടക്ഷന് ഓഫീസര്, ജില്ലാ ചൈല്ഡ് പ്രൊട്ടക്ഷന് യൂണിറ്റ്, മുന്സിപ്പല് ടൗണ്ഹാള് ഷോപ്പിംഗ് കോംപ്ലക്സ്, റൂം നമ്പര് എസ്-6, രണ്ടാം നില, തലശ്ശേരി, 670104 എന്ന വിലാസത്തില് ലഭിക്കണം. മെയില് dcpuknr@gmail.com ഫോണ്: 0490 2967199.