ടിപ്പർ സ്‌കൂട്ടറിലിടിച്ച് യുവതി മരിച്ചു: സഹോദരിക്ക് പരിക്ക്
കായംകുളം: ടിപ്പർ സ്‌കൂട്ടറിലിടിച്ച് യുവതി മരിച്ചു. സഹോദരിക്ക് പരിക്കേറ്റു. മുതുകുളം ചൂളത്തെരുവ് കുന്നുംകീഴിൽ അനില (23) ആണ് മരിച്ചത്. ഒപ്പം യാത്ര ചെയ്തിരുന്ന സഹോദരി ഐശ്വര്യക്ക് നിസാര പരിക്കുണ്ട്. കായംകുളം ഒ.എൻ.കെ ജങ്ഷന് പടിഞ്ഞാറുഭാഗത്ത് കരിവിൽപീടിക ഭാഗത്തെ വളവിൽ തിങ്കളാഴ്ച ഉച്ചക്ക് 12.30നായിരുന്നു അപകടം.
സഹോദരിമാർ സഞ്ചരിച്ച സ്‌കൂട്ടറിൽ പിന്നിൽ നിന്ന് വന്ന ടിപ്പർ ഇടിക്കുകയായിരുന്നു. ഐശ്വര്യയാണ് സ്‌കൂട്ടർ ഓടിച്ചത്. ഇരുവരും കായംകുളത്ത് പോയി തിരികെ വീട്ടിലേക്ക് മടങ്ങും വഴിയായിരുന്നു അപകടം.
ടിപ്പർ സ്‌കൂട്ടറിൽ ഇടിച്ചതിനെ തുടർന്ന് അനില ടിപ്പറിന്‍റെ ടയറിനടിയിൽപെടുകയായിരുന്നുവെന്ന് നാട്ടുകാർ പറഞ്ഞു. റോഡിലേക്ക് തെറിച്ച് വീണാണ് ഐശ്വര്യക്ക് പരിക്കേറ്റത്.
