വയലിനിസ്റ്റ് ടി.എന്‍.കൃഷ്ണന്‍ അന്തരിച്ചു
ചെന്നൈ: വയലിനിസ്റ്റ് പ്രൊഫ. ടി.എന്‍.കൃഷ്ണന്‍ (92) അന്തരിച്ചു. വാർദ്ധക്യസഹജമായ അസുഖങ്ങളെ തുടർന്ന് ചെന്നൈയിലെ വസതിയിലായിരുന്നു അന്ത്യം.
വയലിന്‍ സംഗീതത്തിലെ ത്രയങ്ങള്‍ എന്നറിയപ്പെടുന്ന മൂവരില്‍ ഒരാളാണ് അദ്ദേഹം.ലാല്‍ഗുഡി ജയരാമന്‍, എം.എസ്. ഗോപാലകൃഷ്ണന്‍ എന്നിവരാണ് വയലിൻ സംഗീത ത്രയത്തിലെ മറ്റ് രണ്ട് പേര്‍.
ചെമ്പൈ വൈദ്യനാഥ ഭാഗവതര്‍, അരിയക്കുടി രാമാനുജ അയ്യങ്കാര്‍, ശെമ്മാങ്കുടി ശ്രീനിവാസയ്യര്‍, മുസിരി സുബ്രഹ്മണ്യയ്യര്‍, മധുരൈ മണി അയ്യര്‍ തുടങ്ങിയ പ്രമുഖർക്കെല്ലാം വയലിന്‍ വായിച്ചിട്ടുള്ള ടി എൻ കൃഷ്ണൻ കേന്ദ്ര സംഗീതനാടക അക്കാദമി വൈസ് ചെയര്‍മാനായും പ്രവര്‍ത്തിച്ചിട്ടുണ്ട്.
രാജ്യം പത്മശ്രീ, പത്മഭൂഷണ്‍ ബഹുമതികള്‍ നല്‍കി ആദരിച്ചിട്ടുള്ള അദ്ദേഹത്തിന് കേന്ദ്ര സംഗീത നാടക അക്കാദമി അവാര്‍ഡ്, സംഗീത കലാനിധി പുരസ്കാരം തുടങ്ങി നിരവധി പുരസ്കാരങ്ങളും ലഭിച്ചിട്ടുണ്ട്.
