42 തദ്ദേശ വാര്ഡുകളില് മേയ് 17ന് ഉപതെരഞ്ഞെടുപ്പ്
തിരുവനന്തപുരം:സംസ്ഥാനത്ത് അംഗങ്ങളുടെയും കൗണ്സിലര്മാരുടെയും ഒഴിവുണ്ടായ 42 തദ്ദേശ വാര്ഡുകളില് മേയ് 17ന് ഉപതെരഞ്ഞെടുപ്പ് നടത്താന് തീരുമാനിച്ചതായി സംസ്ഥാന തെരഞ്ഞെടുപ്പ് കമ്മീഷണര് എ ഷാജഹാന്.12 ജില്ലകളിലായി രണ്ട് കോര്പ്പറേഷന്, ഏഴ് മുനിസിപ്പാലിറ്റി, രണ്ട് ബ്ലോക്ക് പഞ്ചായത്ത്, 31 ഗ്രാമപഞ്ചായത്ത് വാര്ഡുകളിലേയ്ക്കാണ് ഉപതെരഞ്ഞെടുപ്പ് നടത്തുന്നത്.
വിജ്ഞാപനം ഏപ്രില് 20ന് പുറപ്പെടുവിക്കും. 20 മുതല് 27 വരെ നാമനിര്ദ്ദേശപത്രിക സമര്പ്പിക്കാം. സൂക്ഷ്മപരിശോധന 28ന് നടത്തും. ഏപ്രില് 30വരെ പത്രിക പിന്വലിക്കാം. വോട്ടെടുപ്പ് സമയം രാവിലെ 7 മുതല് വൈകുന്നേരം 6 മണി വരെ. വോട്ടെണ്ണല് മെയ് 18ന് രാവിലെ 10 മണിക്ക് ആരംഭിക്കും. തെരഞ്ഞെടുപ്പ് മാതൃകാ പെരുമാറ്റച്ചട്ടം നിലവില് വന്നു.
അര്ഹതയുള്ള സ്ഥാനാര്ഥികള്ക്ക് നിക്ഷേപത്തുക കാലതാമസം കൂടാതെ തിരികെ ലഭിക്കുന്നതിന് നാമനിര്ദ്ദേശ പത്രികയോടൊപ്പം കമ്മീഷന് പുതിയതായി ഏര്പ്പെടുത്തിയ ഫാം കൂടി പൂരിപ്പിച്ചു നല്കണം. തെരഞ്ഞെടുപ്പിനു മുന്നോടിയായി അന്തിമ വോട്ടര്പട്ടിക മാര്ച്ച് 16ന് പ്രസിദ്ധീകരിച്ചിരുന്നു. പട്ടികയില് ഉള്പ്പെട്ടിട്ടില്ലാത്തവര്ക്ക് പേര് ചേര്ക്കുന്നതിനും ഉള്ക്കുറിപ്പുകളില് ഭേദഗതി വരുത്തുന്നതിനും വീണ്ടും അവസരം നല്കിയിരുന്നു. സപ്ലിമെന്ററി പട്ടികകള് ഏപ്രില് 25ന് പ്രസിദ്ധീകരിക്കും. വരണാധികാരികള്ക്കും ഉപവരണാധികാരികള്ക്കുമുള്ള പരിശീലനം കമ്മീഷന് ഓഫീസില് നല്കി
ഉപതെരഞ്ഞെടുപ്പ് നടക്കുന്ന വാര്ഡുകള്
കണ്ണൂര്- കണ്ണൂര് മുനിസിപ്പല് കോര്പ്പറേഷനിലെ കക്കാട്, പയ്യന്നൂര് മുനിസിപ്പാലിറ്റിയിലെ മുതിയലം, മുഴുപ്പിലങ്ങാട് ഗ്രാമപഞ്ചായത്തിലെ തെക്കേക്കുന്നുമ്ബ്രം, മാങ്ങാട്ടിടം ഗ്രാമപഞ്ചായത്തിലെ നീര്വ്വേലി, കുറുമാത്തൂര് ഗ്രാമപഞ്ചായത്തിലെ പുല്ലാഞ്ഞിയോട്.