ഇന്ഡിഗോ എയര്പോര്ട്ട് മാനേജര് റ്റി.വി വിജിത്ത് നല്കിയ റിപ്പോര്ട്ട് വ്യാജമാണെന്ന് പ്രതിപക്ഷ നേതാവ്
കൊച്ചി:മുഖ്യമന്ത്രിക്ക് എതിരായ തിരുവനന്തപുരം വിമാനത്താവളത്തിലെ പ്രതിഷേധത്തില് ഇന്ഡിഗോ എയര്പോര്ട്ട് മാനേജര് റ്റി.വി വിജിത്ത് നല്കിയ റിപ്പോര്ട്ട് വ്യാജമാണെന്ന് പ്രതിപക്ഷ നേതാവ് വിഡി സതീശൻ. ഇക്കാര്യം വ്യക്തമാക്കി ഇന്ഡിഗോ ദക്ഷിണേന്ത്യന് മേധാവിക്ക് അദ്ദേഹം കത്തുനൽകി. രാഷ്ട്രീയ സമ്മര്ദ്ദത്തിന് വഴങ്ങിയാണ് ഇത്തരമൊരു റിപ്പോര്ട്ട് പൊലീസിന് നല്കിയത്. യൂത്ത് കോണ്ഗ്രസ് പ്രവര്ത്തകരെ ക്രൂരമായി മര്ദ്ദിച്ച ഇ.പി ജയരാജന്റെ പേര് പോലും റിപ്പോര്ട്ടില് പരാമര്ശിക്കാത്തത് ഏറെ ദുരൂഹമാണെന്നും കത്തിൽ ചൂണ്ടിക്കാട്ടുന്നു.
യൂത്ത് കോൺഗ്രസ് പ്രവർത്തകരുടെ പ്രതിഷേധം നടന്നത് മുഖ്യമന്ത്രി വിമാനത്തിൽ ഉള്ളപ്പോഴാണെന്ന് ഇൻഡിഗോ എയർലൈൻസ് വ്യക്തമാക്കിയിരുന്നു.മുഖ്യമന്ത്രിക്ക് നേരെ മുദ്രാവാക്യങ്ങളും മോശം ഭാഷയും ഉപയോഗിച്ച് പാഞ്ഞടുത്തുവെന്ന് കത്തിൽ വിശദീകരിക്കുന്നു. എന്നാൽ ഇ പി ജയരാജന്റെ പേര് കത്തിൽ പരാമർശിച്ചിട്ടില്ല.