കുട്ടി ഡ്രൈവർമാർ ശ്രദ്ധിക്കുക; പിടിച്ചാൽ ലൈസൻസിന് 25 വയസ്സുവരെ കാക്കേണ്ടിവരും
ഡ്രൈവിങ് ലൈസൻസില്ലാതെ വാഹനവുമായി റോഡിലിറങ്ങുന്ന കുട്ടി ഡ്രൈവർമാർ ശ്രദ്ധിക്കുക. നിയമംലംഘിച്ച് വാഹനമോടിച്ചതിന് പിടിയിലായാൽ പിന്നെ 25 വയസ്സ് തികഞ്ഞാലേ ലേണേഴ്സ് ലൈസൻസിന് യോഗ്യതയുണ്ടാവുകയുള്ളുവെന്ന് മോട്ടോർ വാഹന വകുപ്പ്. മധ്യവേനൽ അവധിക്കായി വിദ്യാലയങ്ങൾ അടയ്ക്കുന്നതിനാൽ മാതാപിതാക്കളുടെയും ബന്ധുക്കളുടെയും മുതിർന്ന സുഹൃത്തുക്കളുടെയുമൊക്കെ പേരിലുള്ള വാഹനവുമായി കുട്ടി ഡ്രൈവർമാർ റോഡിലിറങ്ങാൻ സാധ്യത കൂടുന്നതിനാലാണീ മുന്നറിയിപ്പ്.
പ്രായപൂർത്തിയാകാത്ത കുട്ടികൾ വാഹനങ്ങളുമായി റോഡിലിറങ്ങി അപകടത്തിൽപ്പെടുന്നതും മരിക്കുന്നതും കൂടിവരുന്നത് കണക്കിലെടുത്താണ് 2019-ൽ മോട്ടോർവാഹന നിയമം പരിഷ്കരിച്ചപ്പോൾ കേന്ദ്ര റോഡ് ഗതാഗത ഹൈവേ മന്ത്രാലയം ബാല ഡ്രൈവിങ്ങിന് ശിക്ഷ കടുപ്പിച്ചത്. വാഹനമോടിച്ച കുട്ടിക്ക് മാത്രമല്ല, രക്ഷിതാവിനും ശിക്ഷ ലഭിക്കും.
ചില്ലറയല്ല ശിക്ഷ
- ലൈസൻസ് ഇല്ലാതെ വാഹനമോടിച്ചതിന് കുട്ടി ഡ്രൈവർക്ക് 10,000 രൂപവരെ പിഴ ലഭിക്കും.
- രക്ഷിതാവിന് പരമാവധി മൂന്നുവർഷംവരെ തടവും 25,000 രൂപവരെ പിഴയും ലഭിക്കും.
- നിയമലംഘനം നടത്തിയതിന് വാഹനത്തിന്റെ രജിസ്ട്രേഷൻ ഒരുവർഷത്തേക്ക് റദ്ദാക്കും.
- ബാലനീതി നിയമപ്രകാരവും കുട്ടി ഡ്രൈവർക്ക് ശിക്ഷ ലഭിക്കും.
