സ്വർണവിലയിൽ ഇന്നും വർധന, പുതിയ റെക്കോർഡ്

കൊച്ചി: സംസ്ഥാനത്ത് സ്വര്‍ണവിലയിൽ ഇന്നും വർധനവ്. ഒരു പവൻ സ്വർണത്തിന് 80 രൂപയാണ് ഇന്ന് വർധിച്ചത്. ഇതോടെ പവന്റെ വില 52,600 രൂപയായി. സ്വർണവിലയിൽ സർവകാല റെക്കോർഡ് തുകയാണ് ഇത്. ഗ്രാമിന് 10 രൂപ വർധിച്ച് 6575 രൂപയായി. ഇന്നലെ ഒരു പവൻ സ്വർണത്തിന് 240 രൂപ വർധിച്ചിരുന്നു. സ്വർണവിലയിൽ റെക്കോർഡ് ആയിരുന്ന 52,520 രൂപയാണ് 52,600 രൂപയുടെ പുതിയ റെക്കോർഡിട്ടത്.

കഴിഞ്ഞ മാസം 29ന് ആണ് ആദ്യമായി സ്വര്‍ണവില 50,000 കടന്നത്. അന്ന് ഒറ്റയടിക്ക് 440 രൂപ വര്‍ധിച്ച് 50,400 രൂപയായാണ് സ്വര്‍ണവില ഉയര്‍ന്നത്. പിന്നീടുള്ള ദിവസങ്ങളില്‍ ഏറിയും കുറഞ്ഞും നിന്ന സ്വര്‍ണവിലയാണ് ഏപ്രിൽ മൂന്നാം തീയതി മുതല്‍ വീണ്ടും ഉയരാന്‍ തുടങ്ങിയത്. രണ്ടുദിവസത്തിനിടെ ആയിരം രൂപ വര്‍ധിച്ച ശേഷം തുടര്‍ന്നുള്ള ദിവസങ്ങളിലും വില ഉയരുന്നത് തുടരുകയാണ്. ആറുദിവസത്തിനിടെ രണ്ടായിരത്തോളം രൂപയാണ് വര്‍ധിച്ചത്. ഒന്നര മാസത്തിനിടെ 6000 രൂപയിലേറെ വർധനയാണ് സ്വർണത്തിലുണ്ടായത്