കേരള പി.എസ്.സി: പൊതുപ്രാഥമിക പരീക്ഷ എഴുതാത്തവര്‍ക്ക് അവസരം; അപേക്ഷിക്കേണ്ടത് ഇങ്ങനെ
ആദ്യ മൂന്ന് ഘട്ടങ്ങളിലെ പത്താം തലം പൊതു പ്രാഥമിക പരീക്ഷ എഴുതാൻ ആകാത്തവര്‍ക്ക് ഫെബ്രുവരി എട്ടിനുള്ള നാലാം ഘട്ടത്തില്‍ പങ്കെടുക്കാന്‍ അവസരം.
നിശ്ചിത കാരണങ്ങളാല്‍ ഹാജരാകാന്‍ കഴിയാത്ത ഉദ്യോഗാർഥികൾക്കാണ് അവസരം നല്‍കുന്നത്. ഇതിന് ആവശ്യമുള്ള രേഖകള്‍ സഹിതം അപേക്ഷിക്കണം. പരീക്ഷ കേന്ദ്രം ഉള്‍പ്പെടുന്ന പി എസ് സി ജില്ലാ ഓഫീസിലാണ് അപേക്ഷ നല്‍കേണ്ടത്.
ജനുവരി 27 മുതല്‍ 31-ന് വൈകിട്ട് 5.15 വരെ ലഭിക്കുന്ന അപേക്ഷകള്‍ മാത്രമേ സ്വീകരിക്കുകയുള്ളൂ. ജനുവരി 31-ന് ശേഷം ലഭ്യമായ അപേക്ഷകള്‍ പരിഗണിക്കില്ല. അവര്‍ വീണ്ടും അപേക്ഷിക്കണം.
തപാല്‍/ഇ-മെയില്‍ വഴി ലഭിക്കുന്ന അപേക്ഷകള്‍ സ്വീകരിക്കില്ല. മെഡിക്കല്‍ സര്‍ട്ടിഫിക്കറ്റിന്റെ മാതൃക പി എസ് സി വെബ്സൈറ്റ് ഹോം പേജില്‍ മസ്റ്റ് നോ ലിങ്കില്‍ പി എസ് സി എക്സാമിനേഷന്‍ അപ്ഡേറ്റ്സ് എന്ന പേജില്‍ ലഭിക്കും.
അപേക്ഷിക്കേണ്ടത് ഇങ്ങനെ: കഴിഞ്ഞ ഡിസംബര്‍ 28, ജനുവരി 11, 25 തീയതികളിലാണ് ആദ്യഘട്ട പരീക്ഷകള്‍ നടന്നത്.
❇️ഈ ദിവസങ്ങളില്‍ അംഗീകൃത സര്‍വകലാശാല/ സ്ഥാപനങ്ങള്‍ നടത്തിയ പരീക്ഷ ഉണ്ടായിരുന്നവര്‍ രണ്ട് പരീക്ഷകളുടെയും അഡ്മിഷന്‍ ടിക്കറ്റ് (പരീക്ഷ തീയതി തെളിയിക്കുന്നതിന്) സഹിതം അപേക്ഷിക്കണം.
❇️അപകടംപറ്റി ചികിത്സയിൽ ഉള്ളവര്‍/ അസുഖബാധിതര്‍ എന്നിവര്‍ ആശുപത്രിയില്‍ ചികിത്സ നടത്തിയതിന്റെ ചികിത്സാ സര്‍ട്ടിഫിക്കറ്റും മെഡിക്കല്‍ സര്‍ട്ടിഫിക്കറ്റും നിശ്ചിത മാതൃകയില്‍ ഉള്ളത് ഹാജരാക്കണം
❇️പ്രസവസംബന്ധമായ അസുഖം ഉള്ളവര്‍ ചികിത്സാ സര്‍ട്ടിഫിക്കറ്റ്, മെഡിക്കല്‍ സര്‍ട്ടിഫിക്കറ്റ് നിശ്ചിത മാതൃകയിലുള്ളത് എന്നിവ രണ്ടും ചേര്‍ത്ത് അപേക്ഷിക്കണം
❇️ഗര്‍ഭിണികളായ യാത്രാ ബുദ്ധിമുട്ട് ഉള്ളവര്‍/ ഡോക്ടര്‍മാര്‍ വിശ്രമം നിര്‍ദ്ദേശിച്ചിട്ടുള്ളവര്‍ എന്നിവര്‍ അത് തെളിയിക്കുന്നതിനുളള നിശ്ചിത മാതൃകയിലുള്ള മെഡിക്കല്‍ സര്‍ട്ടിഫിക്കറ്റ് ചികിത്സാ സര്‍ട്ടിഫിക്കറ്റ് എന്നിവ ഹാജരാക്കണം.
❇️പരീക്ഷാതീയതിയില്‍ സ്വന്തം വിവാഹം നടന്ന ഉദ്യോഗാര്‍ഥികള്‍ തെളിവ് സഹിതം അപേക്ഷിക്കണം.
❇️ഏറ്റവും അടുത്ത ബന്ധുക്കളുടെ മരണ കാരണം പരീക്ഷ എഴുതാന്‍ കഴിയാത്തവര്‍ രേഖകള്‍സഹിതം അപേക്ഷിക്കണം.
