അതിശക്തമായ മഴയ്ക്ക് സാധ്യത; അര്ധരാത്രി മുതല് ട്രോളിങ് നിരോധനം
തിരുവനന്തപുരം : സംസ്ഥാനത്ത് ഇന്ന് അതിശക്തമായ മഴയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പിന്റെ മുന്നറിയിപ്പ്.ഇതിന്റെ പശ്ചാത്തലത്തില് വടക്കൻ കേരളത്തിലെ വിവിധ ജില്ലകളില് റെഡ്, ഓറഞ്ച് അലർട്ടുകള് പ്രഖ്യാപിച്ചു.
ഈ കാലാവസ്ഥാ മുന്നറിയിപ്പുകള്ക്ക് പുറമെ, സംസ്ഥാനത്തെ തീരമേഖലകളില് ഇന്ന് അർധരാത്രി മുതല് 52 ദിവസത്തെ ട്രോളിങ് നിരോധനവും പ്രാബല്യത്തില് വരികയാണ്.
വടക്കൻ ജില്ലകളായ കാസർകോഡ്, കണ്ണൂർ, കോഴിക്കോട് എന്നിവിടങ്ങളിലാണ് ഇന്ന് അതിതീവ്ര മഴ മുന്നറിയിപ്പായ റെഡ് അലർട്ട് പ്രഖ്യാപിച്ചിരിക്കുന്നത്. കനത്ത മഴ തുടരുന്ന സാഹചര്യത്തില് ഈ മൂന്ന് ജില്ലകളിലെയും പ്രൊഫഷണല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ഇന്ന് അവധി പ്രഖ്യാപിച്ചിട്ടുണ്ട്. കൂടാതെ, തൊട്ടടുത്ത ജില്ലകളായ മലപ്പുറത്തും വയനാടും ഇന്ന് ഓറഞ്ച് അലർട്ടും നല്കിയിട്ടുണ്ട്.