ആലപ്പുഴ കരുവാറ്റയിലെ വയോധികന്റെ കൊലപാതകം; 13കാരിയായ കൊച്ചുമകളടക്കം പ്രായപൂര്ത്തിയാകാത്ത 4 പേര് പിടിയില്
ആലപ്പുഴ: ആലപ്പുഴ കരുവാറ്റയിലെ വയോധികന്റെ കൊലപാതകത്തില് 13 വയസുള്ള കൊച്ചുമകള് ഉള്പ്പെടെ പ്രായപൂര്ത്തിയാകാത്ത നാല് പേര് പിടിയില്. കഴിഞ്ഞദിവസം രാത്രിയായിരുന്നു കൊലപാതകം. കൊല്ലപ്പെട്ട ശിവന്കുട്ടിയുടെ മകളുടെ മകള് നല്കിയ ക്വട്ടേഷനാണ് കൊലപാതകത്തില് കലാശിച്ചതെന്ന് പൊലീസ് കണ്ടെത്തി. ശിവന്കുട്ടിയുടെ ഭാര്യയും മകളും വീട്ടിലില് ഇല്ലാതിരുന്ന സമയത്തായിരുന്നു സംഭവം.
അന്വേഷണത്തിന്റെ ആദ്യ ഘട്ടത്തില് തന്നെ ഒരു പ്രൊഫഷണല് കൊലപാതകിയല്ല ഇതിന് പിന്നിലെന്ന് പൊലീസ് ഉറപ്പിച്ചിരുന്നു. വീട്ടിനുള്ളില് ഒരാളുടെ സഹായം ലഭിച്ചിട്ടുണ്ടെന്ന സംശയം നിലനില്ക്കേയാണ് എട്ടാം ക്ലാസുകാരിയാണ് കൊലയ്ക്ക് പിന്നിലെന്ന് പൊലീസ് മനസിലാക്കിയത്. 67 വയസുള്ള ശിവന്കുട്ടിയുടെ മൃതദേഹം വിവസ്ത്രനായ നിലയിലാണ് കണ്ടെത്തിയത്. കൈകളും കാലുകളും ബന്ധിച്ചിരുന്നു. വീട്ടിനുള്ളിലാകെ മുളകുപൊടി വിതറിയിരുന്നു. വീട്ടില് നിന്നും ആറു പവന് സ്വര്ണവും കാണാതായിട്ടുണ്ട്. പ്രതികള് നിലവില് ഹരിപ്പാട് പൊലീസിന്റെ കസ്റ്റഡിയിലാണ്.