ചെങ്കോട്ടയില്‍ കൊടിയുയര്‍ത്താന്‍ ശ്രമിച്ച കേസ് ഉൾപ്പെടെയുള്ള സംഘർഷത്തിൽ പഞ്ചാബി ചലച്ചിത്ര നടൻ ദീപ് സിംഗ് സിദ്ധു അറസ്റ്റില്‍.
ന്യൂഡല്‍ഹി: റിപ്പബ്ലിക് ദിനത്തില്‍ കര്‍ഷകരുടെ ട്രാക്ടര്‍ റാലിക്കിടയില്‍ ചെങ്കോട്ടയില്‍ കൊടിയുയര്‍ത്താന്‍ ശ്രമിച്ച കേസ് ഉൾപ്പെടെയുള്ള സംഘർഷത്തിൽ പഞ്ചാബി ചലച്ചിത്ര നടൻ ദീപ് സിംഗ് സിദ്ധു അറസ്റ്റില്‍. പഞ്ചാബില്‍ വച്ച്‌ ഡല്‍ഹി പോലീസിന്‍റെ സ്പെഷ്യല്‍ സെല്ലാണ് അറസ്റ്റ് ചെയ്തത്. ചെങ്കോട്ടയിലെ അക്രമ സംഭവങ്ങള്‍ക്ക് ശേഷം ദിവസങ്ങളായി ഒളിവിലായിരുന്നു സിദ്ധു.
ചെങ്കോട്ടയിലുണ്ടായ സംഘര്‍ഷങ്ങള്‍ക്ക് പിന്നില്‍ ദീപ് സിദ്ദുവാണെന്ന് കര്‍ഷക നേതാക്കള്‍ നേരത്തെ ആരോപിച്ചിരുന്നു. ചെങ്കോട്ടയില്‍ അക്രമം നടത്തിയതും പതാക ഉയര്‍ത്തിയതും ദീപ് സിദ്ധുവിന്‍റെ നേതൃത്വത്തിലുള്ള സംഘമാണ്.
ആ സമരവുമായി ഞങ്ങള്‍ക്ക് ബന്ധമില്ലെന്നും അക്രമസമരത്തെ തള്ളിക്കളയുന്നുവെന്നും കര്‍ഷക നേതാക്കള്‍ വ്യക്തമാക്കിയിരുന്നു.
ചെങ്കോട്ടയിലെ സംഘര്‍ഷത്തില്‍ കോട്ട് വാലി സ്റ്റേഷനില്‍ എഫ്‌ഐആര്‍ രേഖപ്പെടുത്തി കേസ് എടുത്തിരുന്നു. അനിഷ്ടസംഭവങ്ങളില്‍ ആരോപണവിധേയനായ ദീപ് സിദ്ധുവിനെക്കുറിച്ച്‌ വിവരം നല്‍കുന്നവര്‍ക്ക് ഒരു ലക്ഷം രൂപ ഡല്‍ഹി സര്‍ക്കാര്‍ പ്രഖ്യാപിച്ചിരുന്നു. ചെങ്കോട്ടയില്‍ കൊടി കെട്ടിയ ജുഗു രാജ് സിംഗിന്‍റെ തന്‍ തരനിലെ വീട്ടിലും പോലീസ് റെയ്ഡ് നടത്തിയിരുന്നു.
