ദേശീയ ഷൂട്ടിങ് താരം മരിച്ച നിലയില്‍
മൊഹാലി: ദേശീയ ഷൂട്ടിങ് താരം നമന്‍വീര്‍ സിങ് ബ്രാറിനെ മൊഹലിയില്‍ മരിച്ച നിലയില്‍ കണ്ടെത്തി. 29 വയസായിരുന്നു.നഗരത്തിലെ സെക്ടര്‍ 71ലെ വീട്ടില്‍ വെച്ച്‌ സ്വയം വെടിയുതിര്‍ത്ത് മരിക്കുകയായിരുന്നുവെന്ന് പൊലീസ് പറഞ്ഞു.
പുലര്‍ച്ചെ 3.35നായിരുന്നു സംഭവം. വെടിയൊച്ച കേട്ട് ഓടിയെത്തിയ ബന്ധുക്കള്‍ ആശുപത്രിയില്‍ എത്തിച്ചെങ്കിലും മരിച്ചിരുന്നു. കടുംകൈ ചെയ്യാനുണ്ടായ സാഹചര്യം വ്യക്തമല്ലെന്ന് ബ്രാറിന്‍റെ കുടുംബം പറഞ്ഞു. സിവില്‍ ആശുപത്രിയില്‍ വെച്ച്‌ പോസ്റ്റ്മോര്‍ട്ടം നടത്തി.
പഞ്ചാബ് സര്‍വകലാശാല വിദ്യാര്‍ഥിയായിരുന്ന ബ്രാര്‍ അങ്കൂര്‍ മിത്തല്‍, അസ്ഗര്‍ ഹുസൈന്‍ ഖാന്‍ എന്നിവര്‍ക്കൊപ്പം 2015ല്‍ ദക്ഷിണകൊറിയയിലെ ഗ്വാങ്ചുവില്‍ നടന്ന ലോക യൂനിവേഴ്സിറ്റി ഗെയിംസില്‍ ഡബിള്‍ ട്രാപ്പില്‍ വെങ്കലം സ്വന്തമാക്കിയിരുന്നു. അതേ വര്‍ഷം തന്നെ ആള്‍ ഇന്ത്യ യൂനിവേഴ്സിറ്റി ഷൂട്ടിങ് ചാമ്പ്യൻഷിപ്പിൽ അദ്ദേഹം വെങ്കലം സ്വന്തമാക്കിയിരുന്നു.
പോളണ്ടില്‍ നടന്ന എഫ്.ഐ.എസ്.യു ലോക യൂനിവേഴ്സിറ്റി ഷൂട്ടിങ് ചാമ്ബ്യന്‍ഷിപ്പില്‍ വെങ്കലം നേടിയ ഇന്ത്യന്‍ ടീമിന്‍റെ ഭാഗമായിരുന്നു അദ്ദേഹം. മാസ്റ്റേഴ്സ് മീറ്റ് ചാമ്ബ്യന്‍ഷിപില്‍ സ്വര്‍ണം നേടിയ ബ്രാര്‍ യുവ ഷൂട്ടര്‍മാരുടെ കോച്ച്‌ ആയി പ്രവര്‍ത്തിച്ച്‌ വരികയായിരുന്നു.
