നടി അർച്ചന കവിയുടെ പരാതി; ആഭ്യന്തര അന്വേഷണം ആരംഭിച്ച് കൊച്ചി പൊലീസ്
പൊലീസിനെതിരെ നടി അർച്ചന കവിയുടെ ഇൻസ്റ്റഗ്രാം പരാമർശത്തിൽ ആഭ്യന്തര അന്വേഷണം ആരംഭിച്ചു. നടി പരാതി നൽകിയിട്ടില്ലെങ്കിലും പൊലീസ് ഗൗരവത്തോടെയാണ് ഈ വിഷയത്തെ സമീപിക്കുന്നത്. പോസ്റ്റിൽ അർച്ചന കവി പറഞ്ഞ സ്ഥലങ്ങളിൽ ഡ്യൂട്ടിയിലുണ്ടായിരുന്ന പോലീസുകാർ ആരാണെന്നാണ് അന്വേഷണം.
കഴിഞ്ഞ ദിവസം സുഹൃത്തിനും കുടുംബത്തിനുമൊപ്പം ഓട്ടോറിക്ഷയിൽ ഫോർട്ട് കൊച്ചിയിലേക്ക് പോകുന്നതിനിടെ പൊലീസ് തന്നോട് അപമര്യാദയായി പെരുമാറിയെന്ന് നടി ഇൻസ്റ്റഗ്രാമിൽ കുറിച്ചു. സ്ത്രീകൾക്ക് മാത്രമായി ഓട്ടോറിക്ഷയിൽ യാത്ര ചെയ്യവേയാണ് തങ്ങളെ തടഞ്ഞു നിർത്തി ചോദ്യം ചെയ്തതെന്ന് അർച്ചന പറഞ്ഞു. ഈ സമയത്ത് യാത്ര ചെയ്യുന്നത് തെറ്റാണോ എന്ന ചോദ്യവുമായാണ് അർച്ചന പോസ്റ്റ് പങ്കുവച്ചത്. കേരള പോലീസ്, ഫോർട്ട് കൊച്ചി തുടങ്ങിയ ഹാഷ്ടാഗുകളും പോസ്റ്റിൽ ചേർത്തിട്ടുണ്ട്.
