നടി അർച്ചന കവിയുടെ പരാതി; മോശമായി പെരുമാറിയില്ലെന്ന് പൊലീസുകാരൻ
നടി അർച്ചന കവി ഉന്നയിച്ച ആരോപണങ്ങൾ നിഷേധിച്ച് പൊലീസുകാരൻ. അർച്ചനയോടും സുഹൃത്തുക്കളോടും അപമര്യാദയായി പെരുമാറിയിട്ടില്ലെന്ന് പൊലീസുകാരൻ പറഞ്ഞു. പട്രോളിങ്ങിന്റെ ഭാഗമായാണ് വിവരങ്ങൾ ശേഖരിച്ചതെന്നാണ് ന്യായീകരണം. അതേസമയം, പൊലീസുകാരനെതിരെ ആഭ്യന്തര അന്വേഷണം ആരംഭിച്ചിട്ടുണ്ട്. അതേസമയം, പൊലീസുകാരൻറെ ചോദ്യം പരുഷമാണെന്നും ചോദ്യങ്ങൾ ചോദിച്ച രീതി ശരിയല്ലെന്നും അർച്ചന കവി പറഞ്ഞു.
രാത്രിയിൽ ഓട്ടോറിക്ഷയിൽ സ്ത്രീകൾ മാത്രം യാത്ര ചെയ്യുന്നതിനിടെ കൊച്ചിയിൽ പൊലീസിൽ നിന്ന് തനിക്ക് ദുരനുഭവം ഉണ്ടായതായി നടി അടുത്തിടെ സോഷ്യൽ മീഡിയയിൽ ആരോപിച്ചിരുന്നു. സുഹൃത്തിനും കുടുംബത്തിനുമൊപ്പം വീട്ടിലേക്ക് മടങ്ങുമ്പോൾ പോലീസ് തടഞ്ഞുനിർത്തി വളരെ മോശമായി പെരുമാറിയെന്നും വീട്ടിലേക്ക് പോകുന്നുവെന്ന് പറഞ്ഞപ്പോൾ എന്തിനാണ് വീട്ടിലേക്ക് പോകുന്നതെന്ന് പൊലീസ് ചോദിച്ചെന്നും കേരള പൊലീസും ഫോർട്ട് കൊച്ചിയും എന്ന ഹാഷ്ടാഗുകളിൽ പങ്കുവെച്ച കുറിപ്പിൽ അർച്ചന പറയുന്നു.
