ഭാഷാപഠനത്തില്‍ മിടുക്ക് കാട്ടി കോട്ടയം; ഗണിതത്തിലും ശാസ്ത്രത്തിലും മുന്നിൽ എറണാകുളം
കേരളത്തിലെ പ്രാദേശിക ഭാഷാ പഠനത്തിൽ ഏറ്റവും മികച്ചവരാണ് കോട്ടയത്തെ കുട്ടികളെന്ന് വിദ്യാഭ്യാസ മന്ത്രാലയം നടത്തിയ സർവേയിൽ പറയുന്നു. നാഷണൽ അച്ചീവ്മെൻറ് സർവേ പ്രകാരം ഇംഗ്ലീഷ്, മാത്തമാറ്റിക്സ്, സയൻസ്, സോഷ്യോളജി എന്നിവയിൽ എറണാകുളം ഒന്നാം സ്ഥാനത്താണ്. ഈ വിഷയങ്ങളിൽ തിരുവനന്തപുരത്തിനാണ് രണ്ടാം സ്ഥാനം.
3, 5, 8, 10 ക്ലാസുകളിലെ വിദ്യാർത്ഥികൾ ഭാഷ, ഗണിതശാസ്ത്രം, സയൻസ്, സോഷ്യൽ സയൻസ് എന്നിവയിൽ മാർക്ക് നേടിയിട്ടുണ്ട്. 2021 നവംബറിൽ നടത്തിയ സർവേയിൽ 720 ജില്ലകളിലെ 1.18 ലക്ഷം സ്കൂളുകളിൽ നിന്നുള്ള 34 ലക്ഷം വിദ്യാർത്ഥികൾ പങ്കെടുത്തു. മലപ്പുറം, കണ്ണൂർ, ആലപ്പുഴ, തിരുവനന്തപുരം, എറണാകുളം, കൊല്ലം, തൃശ്ശൂർ ജില്ലകളാണ് പ്രാദേശിക ഭാഷാ പഠനത്തിൽ കോട്ടയത്തിൻ പിന്നിൽ.
സയൻസ് വിഷയങ്ങളിൽ ആലപ്പുഴ മൂന്നാം സ്ഥാനത്താണ്. കോട്ടയം, തൃശ്ശൂർ, പത്തനംതിട്ട ജില്ലകളാണ് തൊട്ടുപിന്നിൽ. ഗണിതശാസ്ത്രത്തിൽ കോട്ടയത്തെ കുട്ടികളാണ് മൂന്നാം സ്ഥാനത്ത്. തൃശ്ശൂർ, കണ്ണൂർ, മലപ്പുറം ജില്ലകളാണ് തൊട്ടുപിന്നിൽ. സാമൂഹിക ശാസ്ത്രത്തിൽ കോട്ടയത്തും ആലപ്പുഴയുമാണ് മൂന്നും നാലും സ്ഥാനങ്ങളിൽ.
