വിജയ് ബാബുവിനെ പൊക്കാന്‍ പൊലീസ് ജോര്‍ജിയയിലേക്ക്
നടിയെ ആക്രമിച്ച കേസിൽ നടനും നിർമ്മാതാവുമായ വിജയ് ബാബുവിനെതിരെ റെഡ് കോർണർ നോട്ടീസ് പുറപ്പെടുവിക്കും. കൊച്ചി സിറ്റി പോലീസ് കമ്മീഷണർ സി എച്ച് നാഗരാജുവാണ് ഇക്കാര്യം സ്ഥിരീകരിച്ചത്. നാളെ ഹാജരായില്ലെങ്കിൽ റെഡ് കോർണർ നോട്ടീസ് പുറപ്പെടുവിക്കാനാണ് പോലീസ് ആലോചിക്കുന്നത്. വിജയ് ബാബുവിനെ കണ്ടെത്താനുള്ള ശ്രമങ്ങൾ നടന്നുവരികയാണെന്ന് സി എച്ച് നാഗരാജു പറഞ്ഞു.
ജോർജിയയിലെ എംബസിയുമായി പൊലീസ് ഇതിനകം ബന്ധപ്പെട്ടിട്ടുണ്ട്, അവിടെ വിജയ് ബാബു ഒളിവിലാണെന്ന് കണ്ടെത്തി. പാസ്പോർട്ട് റദ്ദാക്കിയതിനാൽ വിജയ് ബാബുവിനെ നാടുകടത്താനാണ് സാധ്യത. ആവശ്യമെങ്കിൽ ജോർജിയയിലേക്ക് പോകുന്ന കാര്യവും പൊലീസ് സംഘം പരിഗണിക്കുന്നുണ്ടെന്ന് കൊച്ചി സിറ്റി പൊലീസ് കമ്മീഷണർ അറിയിച്ചു.
