കടുത്ത ചൂടില്‍ ഉരുകി കണ്ണൂര്‍; വൈദ്യുതി ഉപയോഗം റെക്കോര്‍‌ഡിലേക്ക്
ഉയർന്ന ചൂടിനൊപ്പം വൈദ്യുത ഉപയോഗവും കത്തിക്കയറുന്നു. മുൻ വർഷങ്ങളെ അപേക്ഷിച്ച്‌ വേഗത്തിലാണ് വൈദ്യുതി ഉപഭോഗത്തിലെ വർദ്ധനവെന്നാണ് കെ.എസ്.ഇ.ബി അറിയിക്കുന്നത്.കഴിഞ്ഞ മാസം11,84,02175 യൂണിറ്റാണ് ജില്ലയിലെ വൈദ്യുതി ഉപയോഗം. ഇങ്ങനെ പോയാല്‍ ഈ മാസത്തെ ഉപഭോഗം ഇതിലും ഏറെ ഉയർന്നതായിരിക്കുമെന്നാണ് ബോർഡ് ഉദ്യോഗസ്ഥരുടെ വിലയിരുത്തല്‍.
രാജ്യത്ത് ഏറ്റവും ഉയർന്ന ചൂട് രേഖപ്പെടുത്തിയ കണ്ണൂരില്‍ മുൻ മാസങ്ങളെ അപേക്ഷിച്ച്‌ 30 ശതമാനത്തിലേറെയാണ് വൈദ്യുതി ഉപയോഗത്തിലെ വർദ്ധന. സാധാരണ ഏപ്രില്‍, മേയ് മാസങ്ങളില്‍ പോലും ഇത്രയും വലിയ ഉപയോഗമുണ്ടാകാറില്ല. സാഹചര്യങ്ങള്‍ വ്യത്യസ്തമാകുമ്ബോള്‍ ഫെബ്രുവരി തൊട്ടുള്ള കണക്കുകള്‍ തന്നെ ഞെട്ടിക്കുകയാണ്. സംസ്ഥാനത്ത് ആകെയുള്ള സ്ഥിതിയും മറ്റൊന്നല്ല.
നിലവിലെ സാഹചര്യം ഗുരുതരമായ വൈദ്യുതി കമ്മിയിലേക്ക് എത്തിക്കുമെന്നതിനാല്‍ ഉത്തരേന്ത്യൻ സംസ്ഥാനങ്ങളില്‍ നിന്ന് വൈദ്യുതി വാങ്ങുന്നതടക്കമുള്ള മാർഗങ്ങളെക്കുറിച്ച്‌ ആലോചിച്ചിട്ടുണ്ടെന്ന് മന്ത്രി കെ.കൃഷ്ണൻ കുട്ടി വ്യക്തമാക്കിയിരുന്നു. നിലവില്‍ അയല്‍ക്കാരായ കർണാടകയും തമിഴ് നാടും ഇതെ പ്രതിസന്ധി അഭിമുഖീകരിക്കുന്നുണ്ടെന്നാണ് കെ.എസ്.ഇ.ബി അധികൃതർ വിശദീകരിക്കുന്നത്.
എ.സി തന്നെ നായകൻ, വില്ലനും
ജനുവരിയോടെ തന്നെ ജില്ലയിലെ എ.സി വില്‍പ്പനയില്‍ കാര്യമായ വർദ്ധനവുണ്ടായി. മുൻ വർഷങ്ങളില്‍ വിറ്റതിന്റെ 50 ശതമാനത്തോളം വർദ്ധനവാണിത്. എ.സികളില്‍ പല രീതിയിലാണ് കറന്റ് ഉപയോഗിക്കുന്നത്. തുച്ഛമായ വിലയില്‍ വില്‍ക്കുന്ന പലതിനും വലിയ അളവ് കറന്റാണ് വേണ്ടിവരുന്നത്. അന്തരീക്ഷ താപനില കൂട്ടുന്നതില്‍ എ.സികള്‍ വലിയ കാരണമാകാനുള്ള സാദ്ധ്യതയുണ്ടെന്ന ഭീഷണിയും മുന്നിലുണ്ട്.
എ.സി തിരഞ്ഞെടുക്കുമ്ബോള്‍
🛑കൂടുതല്‍ പ്രവർത്തനക്ഷമമായതും കുറവ് കറന്റ് ഉപയോഗിക്കുന്നതുമായവ.
🛑സ്റ്റാർ റേറ്റിംഗ് കൂടുതല്‍ ഉള്ളവ തിരഞ്ഞെടുക്കണം
🛑എ.സി സ്ഥാപിക്കുന്നത് കൃത്യമായ സ്ഥലത്താകണം
ഉപയോഗവും ബില്‍ തുകയും കുറയ്ക്കാൻ
🛑ആവശ്യം കഴിഞ്ഞാല്‍ ഫാനും ലൈറ്റും ഓഫ് ചെയ്യുക.
🛑വൈകുന്നേരം ആറ് മുതല്‍ 10 വരെ പരമാവധി ഇലക്‌ട്രിക് സാധനങ്ങള്‍ ഉപയോഗിക്കാതിരിക്കുക.
🛑മോട്ടോർ, വാഷിംഗ് മെഷീൻ, ഇസ്തിരി പെട്ടി തുടങ്ങിയവയുടെ ഉപയോഗം പകല്‍ മാത്രമാക്കുക.
നിലവിലെ സാഹചര്യത്തില്‍ പ്രതിസന്ധികള്‍ മുൻകൂട്ടി കാണുന്നുണ്ട്. ജനങ്ങളും ഈ പ്രതിസന്ധി മനസിലാക്കേണ്ടതുണ്ട്. ഒരു തരത്തിലും വൈദ്യുതി ലഭ്യമാകാത്ത സ്ഥിതി വന്ന് കഴിഞ്ഞാല്‍ ആർക്കും ഒന്നും ചെയ്യാൻ സാധിക്കില്ല. ജനങ്ങള്‍ ബോധവാന്മാരായി വൈദ്യുതി ഉപയോഗം നിയന്ത്രിക്കണം- വൈദുതി ഭവൻ കണ്ണൂർ
