കേരളത്തില് തുലാവർഷം വീണ്ടും സജീവമാകുന്നു
അറബിക്കടലിലും ബംഗാള് ഉള്ക്കടലിലുമായി രൂപപ്പെട്ട കാലാവസ്ഥാ മാറ്റങ്ങള് കാരണം കേരളത്തില് തുലാവർഷം വീണ്ടും സജീവമാകുന്നു.ഇതിന്റെ ഭാഗമായി തെക്കൻ – മധ്യ കേരളത്തിലെ ഏഴ് ജില്ലകളില് കേന്ദ്ര കാലാവസ്ഥാ വകുപ്പ് നവംബർ 23-ന് മഞ്ഞ അലർട്ട് പ്രഖ്യാപിച്ചു.
പ്രധാന അറിയിപ്പുകള്
തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി, എറണാകുളം എന്നീ ജില്ലകളിലാണ് നാളെ മഞ്ഞ അലർട്ട് പ്രഖ്യാപിച്ചിരിക്കുന്നത്. ഈ ജില്ലകളില് ഒറ്റപ്പെട്ട ശക്തമായ മഴയ്ക്ക് സാധ്യതയുണ്ട്. 24 മണിക്കൂറില് 64.5 മില്ലിമീറ്റർ മുതല് 115.5 മില്ലിമീറ്റർ വരെ മഴ ലഭിക്കുന്ന സാഹചര്യത്തെയാണ് ‘ശക്തമായ മഴ’ എന്ന് കാലാവസ്ഥാ വകുപ്പ് നിർവചിച്ചിരിക്കുന്നത്. സംസ്ഥാനത്ത് മഴ ശക്തമാകാൻ കാരണം
കന്യാകുമാരി കടലില് ഒരു ചക്രവാതചുഴി നിലനില്ക്കുന്നതാണെന്നാണ് നിഗമനം. കൂടാതെ ആൻഡമാൻ കടലില് ഒരു ന്യൂനമർദ്ദം രൂപപ്പെട്ടിരിക്കുന്നുണ്ട്. ഇത് പടിഞ്ഞാറ്-വടക്കുപടിഞ്ഞാറ് ദിശയിലേക്ക് സഞ്ചരിച്ച് 24- ഓടെ തെക്കൻ ബംഗാള് ഉള്ക്കടലില് തീവ്ര ന്യൂനമർദ്ദമായി ശക്തിപ്പെടാൻ സാധ്യതയുണ്ട്. ഈ കാലാവസ്ഥാ ഘടകങ്ങളുടെ സ്വാധീനം കേരളത്തില് തുലാവർഷത്തെ കൂടുതല് സജീവമാക്കുകയും അടുത്ത ദിവസങ്ങളില് മഴ തുടരാൻ കാരണമാവുകയും ചെയ്യും.
ജനങ്ങള്ക്കുള്ള മുന്നറിയിപ്പ്
മഞ്ഞ അലർട്ട് പ്രഖ്യാപിച്ച ജില്ലകളിലെ ജനങ്ങള് അതീവ ജാഗ്രത പാലിക്കണമെന്ന് അധികൃതർ അറിയിച്ചു. താഴ്ന്ന പ്രദേശങ്ങളില് താമസിക്കുന്നവരും, മലയോര മേഖലകളിലുള്ളവരും പ്രത്യേക ശ്രദ്ധ പുലർത്തണം. ഇടിമിന്നലോട് കൂടിയ മഴയ്ക്ക് സാധ്യതയുള്ളതിനാല് തുറന്ന സ്ഥലങ്ങളില് നില്ക്കുന്നത് ഒഴിവാക്കുക. കൂടാതെ പുഴകളിലും തോടുകളിലും ജലനിരപ്പ് ഉയരാൻ സാധ്യതയുണ്ട്. അതിനാല് ജാഗ്രത പാലിക്കണം.