കാസർഗോഡ് കാറഡുക്കയില് പുള്ളിപ്പുലി വീട്ടുപറമ്പിലെ കിണറ്റില് ചത്ത നിലയില്
കാറഡുക്ക പഞ്ചായത്തിലെ പെരിയടുക്കയില് പുള്ളിപ്പുലിയെ വീട്ടുപറമ്പിലെ കിണറ്റില് ചത്ത നിലയില് കണ്ടെത്തി.പെരിയടുക്കയിലെ വിനോദ് കുമാറിന്റെ കിണറ്റിലാണ് ഇന്നലെ ഉച്ചയോടെ പുലിയുടെ ജഡം കണ്ടത്. ഏകദേശം ഒരു വയസ് പ്രായമുള്ള പെണ്പുലിയാണെന്നു വനംവകുപ്പിന്റെ പ്രാഥമിക പരിശോധനയില് കണ്ടെത്തി. കേരള-കർണാടക വനാതിർത്തിക്കു സമീപത്തുള്ള ജനവാസമേഖലയാണ് ഈ പ്രദേശം.
വീട്ടാവശ്യത്തിനുള്ള വെള്ളമെടുക്കുന്നതിനായി കിണറിനടുത്തെത്തിയപ്പോഴാണ് പുലിയുടെ ജഡം കണ്ടത്. ജഡത്തിനു അധികം പഴക്കമില്ലാത്തതിനാല് ദുർഗന്ധമൊന്നും ഉണ്ടായിരുന്നില്ല. ഒരു ദിവസം മുമ്പ് വെള്ളം കലങ്ങിയ പോലെ ഉണ്ടായിരുന്നതായി വീട്ടുകാർ പറഞ്ഞു. കിണറ്റില് നിറയെ വെള്ളമുണ്ടായിരുന്നു.
കാറഡുക്കയിലും തൊട്ടടുത്ത മുളിയാർ, ദേലംപാടി പഞ്ചായത്തുകളിലും പലതവണ ജനവാസകേന്ദ്രങ്ങളില് പുലിയിറങ്ങി വളർത്തുമൃഗങ്ങളെ പിടിക്കുന്ന സംഭവങ്ങളുണ്ടായിരുന്നു.