എക്കാലത്തെയും മികച്ച 50 താരങ്ങള്‍; ബ്രിട്ടിഷ് മാഗസിൻ്റെ പട്ടികയില്‍ ഇടം നേടി ഷാരൂഖ് ഖാനും
എംപയര്‍ മാഗസിൻ തിരഞ്ഞെടുത്ത എക്കാലത്തെയും മികച്ച 50 താരങ്ങളുടെ പട്ടികയിൽ ഇന്ത്യയുടെ സൂപ്പർ താരം ഷാരൂഖ് ഖാനും. ഡെൻസൽ വാഷിംഗ്ടൺ, ടോം ഹാങ്ക്സ് ഉൾപ്പെടെയുള്ള ഹോളിവുഡ് സെലിബ്രിറ്റികൾക്കൊപ്പം ബ്രിട്ടീഷ് മാഗസിന്‍റെ പട്ടികയിൽ ഇടം നേടിയ ഏക ഇന്ത്യക്കാരനാണ് ഷാരൂഖ് ഖാൻ.
നാല് ദശകങ്ങളിലായുള്ള വിജയകരമായ അഭിനയ ജീവിതത്തിൽ, ഷാരൂഖ് ഖാന് ദശലക്ഷക്കണക്കിന് ആരാധകരുണ്ടെന്ന് മാഗസിനിലെ പ്രൊഫൈൽ പറയുന്നു. സിദ്ധാർത്ഥ് ആനന്ദ് സംവിധാനത്തിൽ ഷാരൂഖ് ഖാൻ നായകനായ ‘പഠാൻ’ റിലീസിന് ഒരുങ്ങുകയാണ്. ദീപിക പദുക്കോണാണ് ചിത്രത്തിൽ നായികയായി എത്തുന്നത്.
ഷാരൂഖ് ഖാൻ നായകനാകുന്ന മറ്റൊരു പ്രധാന ചിത്രം ‘ജവാനാണ്.’ അറ്റ്‍ലി സംവിധാനം ചെയ്യുന്ന ഷാരൂഖ് ചിത്രത്തിന്റെ ഒടിടി റൈറ്റ്‍സ് നെറ്റ്‍ഫ്ലിക്സ് 120 കോടി രൂപയ്‍ക്ക് സ്വന്തമാക്കിയെന്ന് റിപ്പോര്‍ട്ടുകളുണ്ട്. സാറ്റലൈറ്റ്, ഒടിടി റൈറ്റ്‍സ് വിറ്റുപോയ ഇനത്തില്‍ മാത്രമായി ‘ജവാൻ’ 250 കോടി സ്വന്തമാക്കിയെന്നാണ് റിപ്പോര്‍ട്ട്.
