ഡോക്ടറുടെ വീട്ടിൽ ബാലവേല; പ്രായപൂർത്തിയാകാത്ത പെണ്‍കുട്ടിക്ക് ക്രൂരമര്‍ദ്ദനം
കോഴിക്കോട്: വീട്ടുജോലിക്കായി നിർത്തിയ പ്രായപൂർത്തിയാകാത്ത പെണ്‍കുട്ടിക്ക് ക്രൂരമര്‍ദ്ദനം. കോഴിക്കോട് പന്തീരങ്കാവിലെ സ്വകാര്യ ആശുപത്രിയിലെ ഡോക്ടറും ഭാര്യയുമാണ് പതിനഞ്ചുകാരിയെ വീട്ടുജോലി ചെയ്യിപ്പിച്ചതും ക്രൂരമായി മര്‍ദ്ദിച്ചതും. ഉത്തരേന്ത്യൻ സ്വദേശിയാണ് പെൺകുട്ടി. കുട്ടിയെ ബെൽറ്റ് ഉപയോഗിച്ച് അടിക്കുകയും പൊള്ളലേൽപ്പിക്കുകയും ചെയ്തുവെന്നാണ് പരാതി. ചൈൽഡ് ലൈൻ അധികൃതർ കുട്ടിയെ ബാലികാ മന്ദിരത്തിലേക്ക് മാറ്റി. പന്തീരാങ്കാവ് പൊലീസ് കുട്ടിയുടെ വിശദമായ മൊഴി രേഖപ്പെടുത്തുകയാണ്. വീട്ടുജോലിക്കായി പെൺകുട്ടിയെ നിര്‍ത്തിയതും ക്രൂരമായി മര്‍ദ്ദിക്കുന്നതും ശ്രദ്ധയിൽപ്പെട്ട ചില അയൽവാസികളാണ് സംഭവം ചൈൽഡ് ലൈൻ പ്രവർത്തകരെ അറിയിച്ചത്.
