ഐഎസ്എല്ലില്‍ ഇന്ന് ബ്ലാസ്റ്റേഴ്സ്-എടികെ എല്‍ ക്ലാസിക്കോ
കൊച്ചി: ഐഎസ്എല്ലിൽ കേരള ബ്ലാസ്റ്റേഴ്സ് ഇന്ന് വീണ്ടും കളത്തിലിറങ്ങും. സീസണിലെ രണ്ടാം ഹോം മാച്ചിൽ മഞ്ഞപ്പട കൊൽക്കത്തൻ വമ്പന്മാരായ എ.ടി.കെ മോഹൻ ബഗാനെ നേരിടും. രാത്രി 7.30ന് കൊച്ചിയിലാണ് മത്സരം. ബ്ലാസ്റ്റേഴ്സ്-എടികെ മത്സരത്തിനുള്ള എല്ലാ ടിക്കറ്റുകളും നേരത്തെ വിറ്റഴിഞ്ഞിരുന്നു. അതിനാൽ ഇന്നും മഞ്ഞപ്പട ഗാലറി നിറയ്ക്കുമെന്നാണ് സംഘാടകരുടെ പ്രതീക്ഷ.
കേരള ബ്ലാസ്റ്റേഴ്സും എടികെ മോഹൻ ബഗാനും തമ്മിലുള്ള മത്സരം ഐഎസ്എൽ ചരിത്രത്തിൽ എൽ-ക്ലാസിക്കോ എന്ന വിശേഷണമുള്ള മത്സരമാണ്. രണ്ട് തവണ ബ്ലാസ്റ്റേഴ്സിന്‍റെ കിരീട സ്വപ്നം തകർത്ത ടീമാണ് എടികെ മോഹൻ ബഗാൻ. 2014 ലെ ആദ്യ സീസണിലും 2016 ലെ മൂന്നാം സീസണിലും എടികെ ഫൈനലിൽ മഞ്ഞപ്പടയുടെ കുതിപ്പ് തടഞ്ഞു.
ഇത്തവണ ബ്ലാസ്റ്റേഴ്സ് വിജയത്തോടെ കളി തുടങ്ങിയപ്പോൾ ആദ്യ മത്സരത്തിൽ എടികെ ബഗാൻ പരാജയപ്പെട്ടിരുന്നു. കൊച്ചിയിൽ കേരള ബ്ലാസ്റ്റേഴ്സ് 3-1ന് ഈസ്റ്റ് ബംഗാളിനെ തകർത്തപ്പോൾ, എടികെ ബഗാൻ 1-2ന് ചെന്നൈയിൻ എഫ്സിയോട് തോൽവി വഴങ്ങുകയായിരുന്നു.
