റെക്കോർഡുകൾ തകർത്ത് ലോക; എമ്പുരാനെ മറികടന്നു, 300 കോടി നേടുന്ന ആദ്യ മലയാള ചിത്രം

ഡൊമിനിക് അരുൺ സംവിധാനം ചെയ്ത സൂപ്പർഹീറോ ചിത്രമായ ലോക: ചാപ്റ്റർ 1 – ചന്ദ്ര മോളിവുഡിലെ നിരവധി റെക്കോർഡുകൾ തകർത്ത് മുന്നേറുകയാണ്. എക്കാലത്തെയും ഏറ്റവും കൂടുതൽ കളക്ഷൻ നേടിയ മലയാള ചിത്രം, കേരളത്തിൽ ഏറ്റവും കൂടുതൽ കളക്ഷൻ നേടിയ ചിത്രം എന്നീ നേട്ടങ്ങൾക്ക് പുറമേ, മോഹൻലാൽ, മമ്മൂട്ടി തുടങ്ങിയ മുൻനിര ചിത്രങ്ങളെ മറികടന്ന് മലയാളത്തിൽ 300 കോടി രൂപ കടക്കുന്ന ആദ്യ ചിത്രമായും ലോക മാറി.

ഓഗസ്റ്റ് 28 ന് തിയേറ്ററുകളിൽ റിലീസ് ചെയ്ത ലോക, ഈ വർഷത്തെ അപ്രതീക്ഷിത വിജയമായി മാറുകയായിരുന്നു. കല്യാണി പ്രിയദർശൻ, നസ്ലെൻ, സാൻഡി എന്നിവർ പ്രധാന വേഷങ്ങളിൽ അഭിനയിച്ച ചിത്രം റിലീസ് ചെയ്ത ആദ്യ 40 ദിവസങ്ങളിൽ 299.9 കോടി രൂപ കടന്നതായും അതിനുശേഷം 300 കോടി മറികടന്നതായും സാക്‌നിൽക് കണക്കുകൾ പറയുന്നു.

പൃഥ്വിരാജ് സുകുമാരന്റെ സംവിധാനത്തിൽ മോഹൻലാൽ പ്രധാന വേഷത്തിലെത്തിയ എൽ2- എമ്പുരാന്റെ 265.5 കോടി രൂപ റെക്കോർഡ് ലോക മറികടന്നു. 240 കോടി രൂപ നേടിയ മഞ്ഞുമ്മൽ ബോയ്‌സ് മൂന്നാമതും 234.5 കോടി രൂപ കളക്ഷൻ നേടിയ മോഹൻലാലിന്റെ തുടരും നാലാമതുമാണ്.

ലോക ചാപ്റ്റർ 2 ഇതിനകം പ്രഖ്യാപിച്ചുകഴിഞ്ഞു. ടൊവിനോ ആയിരിക്കും ഇതിലെ കേന്ദ്ര കഥാപാത്രം. മൈക്കൽ എന്ന് പേരുള്ള ചാത്തനായാണ് ടൊവിനോ എത്തുക. ദുൽഖർ സൽമാൻ ചാർലി എന്ന പേരുള്ള ഒടിയനായും ചിത്രത്തിലെത്തിയേക്കും. ലോക ചാപ്റ്റർ 1 ലും ഇരുവരും ചെറുവേഷത്തിൽ എത്തിയിരുന്നു. കല്യാണി പ്രിയദർശനേയും രണ്ടാം ഭാഗത്തിൽ പ്രതീക്ഷിക്കാം.