മമ്പറം ദിവാകരനെ അനുനയിപ്പിച്ച് കോൺഗ്രസ്; സുധാകരനെതിരേ മത്സരിക്കാനുള്ള തീരുമാനം പിൻവലിച്ചു
കണ്ണൂർ: ലോക്സഭാ തെരഞ്ഞടുപ്പിൽ കണ്ണൂരില് സ്വതന്ത്രനായി മത്സരിക്കാനുള്ള തീരുമാനം പിന്വലിച്ച് മമ്പറം ദിവാകരന്. കോണ്ഗ്രസില് തിരിച്ചെടുക്കാമെന്ന് പാര്ട്ടി അറിയിച്ചതിനെ തുടര്ന്നാണ് തീരുമാനം.
രണ്ടര വര്ഷം മുമ്പാണ് മമ്പറം ദിവാകരനെ അച്ചടക്കലംഘനത്തിന്റെ പേരിൽ കോണ്ഗ്രസില് നിന്നും പുറത്താക്കിയത്. ഇന്ദിരാഗാന്ധി സഹകരണ ആശുപത്രി തെരഞ്ഞെടുപ്പുമായി ബന്ധപ്പെട്ടായിരുന്നു നടപടി.
പിന്നീട് പാർട്ടിയിൽ തിരിച്ചെടുക്കാത്തതിൽ പ്രതിഷേധിച്ച് കെ.സുധാകരനെതിരെ കണ്ണൂരില് സ്വതന്ത്രനായി മത്സരിക്കുമെന്ന് മന്പറം പ്രഖ്യാപിച്ചിരുന്നു. ഇതിന് പിന്നാലെ കെപിസിസി പ്രസിഡന്റിന്റെ ചുമതല വഹിക്കുന്ന എം.എം.ഹസനും കെപിസിസി സെക്രട്ടറി പി.എം.നിയാസും മന്പറവുമായി അനുയന ചർച്ച നടത്തി. പാർട്ടിയിൽ തിരിച്ചെടുക്കുമെന്ന് ഹസൻ ഉറപ്പുനൽകുകയായിരുന്നു.പുറത്താക്കുന്ന സമയത്ത് കെപിസിസി എക്സിക്യൂട്ടീവ് അംഗമായിരുന്നു മമ്പറം ദിവാകരന്. ആ പദവി ഉള്പ്പെടെ തിരിച്ചു നല്കുന്നതില് വൈകാതെ തന്നെ തീരുമാനമുണ്ടാകുമെന്നും നേതൃത്വം മന്പറത്തെ അറിയിച്ചിട്ടുണ്ട്.