കേസിന്റെ അന്വേഷണം നീങ്ങുന്നത് തെറ്റായ ദിശയിൽ; മുഖ്യമന്ത്രിയെ കൈവിടാതെ സിപിഎം
തിരുവനന്തപുരം: കേന്ദ്ര ഏജൻസികളെയും ചില മാധ്യമങ്ങളെയും ഉപയോഗിച്ച് മാസങ്ങളായി പ്രചരിപ്പിച്ച നുണക്കഥകളാണ് ഇപ്പോൾ രഹസ്യമൊഴിയുടെ പേരിൽ പ്രചരിക്കുന്നതെന്ന് സി.പി.എം സംസ്ഥാന സെക്രട്ടേറിയറ്റ്. കേന്ദ്ര ഏജൻസികളെ രാഷ്ട്രീയ ആവശ്യങ്ങൾക്കായി ഉപയോഗിക്കുന്ന രീതിയാണ് ബിജെപി സർക്കാർ രാജ്യത്തുടനീളം നടപ്പാക്കുന്നത്. തൽഫലമായി, സ്വർണക്കടത്ത് കേസിന്റെ അന്വേഷണം കേരളത്തിൽ തെറ്റായ ദിശയിലാണ് നീങ്ങുന്നത്.
സ്വർണക്കടത്ത് ശരിയായ രീതിയിൽ അന്വേഷിക്കുന്ന നിലപാടാണ് ആദ്യഘട്ടത്തിൽ തന്നെ സംസ്ഥാന സർക്കാർ സ്വീകരിച്ചത്. അതുകൊണ്ടാണ് ഇത്തരം കാര്യങ്ങൾ ഉത്തരവാദപ്പെട്ട ഏജൻസികൾ അന്വേഷിക്കണമെന്ന നിലപാട് അദ്ദേഹം സ്വീകരിച്ചത്. അന്വേഷണത്തിൽ കണ്ടെത്തേണ്ട ഏറ്റവും പ്രധാനപ്പെട്ട വസ്തുത, ആരാണ് സ്വർണ്ണം അയച്ചത്, അത് ആർക്കൊക്കെ എത്തി എന്നതാണ്. അത്തരമൊരു അന്വേഷണം ചില ബി.ജെ.പി നേതാക്കളിലേക്ക് എത്തുന്ന സാഹചര്യമുണ്ടായി.
ഈ ഘട്ടത്തിലാണ് പുതിയ തിരക്കഥകൾ സൃഷ്ടിക്കുകയും മാധ്യമങ്ങളിൽ പ്രചരിപ്പിക്കുകയും ചെയ്തത്. അന്വേഷണ ഏജൻസികളെ ആ വഴിക്ക് കൊണ്ടുപോകാൻ സമ്മർദ്ദമുണ്ടായിരുന്നു. ഈ ഘട്ടത്തിൽ ചില ഉദ്യോഗസ്ഥരെ സ്ഥലം മാറ്റുകയും പുതിയവരെ നിയമിക്കുകയും ചെയ്യുന്ന സാഹചര്യവും ഉണ്ടായിരുന്നു. ഇതിന് പിന്നാലെയാണ് സംസ്ഥാനത്തെ ജനങ്ങളുടെ ശക്തമായ പ്രതിഷേധം ഉയർന്നത്.
