സമരത്തിനെതിരായ അധിക്ഷേപം; മേജര് രവിക്ക് വക്കീല് നോട്ടീസ് അയച്ച് പ്ലസ്ടു വിദ്യാര്ത്ഥി
തിരുവനന്തപുരം: ഡല്ഹി ജന്തര് മന്തറിലെ വിദ്യാര്ത്ഥി സമരത്തെ അധിക്ഷേപിച്ച മേജര് രവിക്ക് വക്കീല് നോട്ടീസ്. പ്ലസ്ടു വിദ്യാര്ത്ഥി മാളവിക ആര് തീക്കാടനാണ് നോട്ടീസ് അയച്ചത്. മദ്യത്തിനും സൗജന്യഭക്ഷണത്തിനും വേണ്ടിയാണ് സമരം എന്നതടക്കമുള്ള ആരോപണങ്ങള് പിന്വലിക്കണം. അഞ്ച് ദിവസത്തിനകം വിവാദ വീഡിയോ പിന്വലിച്ച് നിരുപാധികം മാപ്പ് പറയണം. 10ലക്ഷം രൂപ നഷ്ടപരിഹാരം നല്കണം എന്നും വക്കീല് നോട്ടീസില് ആവശ്യപ്പെടുന്നു. സുപ്രീംകോടതി അഭിഭാഷകനായ വിനീത് എസ് വര്ക്കലവിള മുഖേനയാണ് നോട്ടീസ് അയച്ചത്.
കോക്രോച്ച് കാമ്പയിന് പിആര് വര്ക്ക് ആണെന്നും സ്വന്തം കപ്പാസിറ്റി അറിയാത്ത ഫ്രസ്ട്രേറ്റഡ് യുവതയാണ് അവരെ പിന്തുണയ്ക്കുന്നതെന്നുമായിരുന്നു മേജര് രവിയുടെ പരാമര്ശം. കേരളത്തിലെ പണിയില്ലാത്ത ആര്ടിസ്റ്റുകള് ഡല്ഹിയിലെത്തി ഒച്ചയും ബഹളവും ഉണ്ടാക്കുകയാണെന്നും മേജര് രവി പറഞ്ഞിരുന്നു.