മുല്ലപ്പെരിയാര് വിഷയം; തമിഴ്നാട് സര്ക്കാരുമായി മുഖ്യമന്ത്രി തലത്തില് ചര്ച്ച നടത്തും,മന്ത്രി മോന്സ് ജോസഫ്
കോട്ടയം: മുല്ലപ്പെരിയാര് വിഷയത്തില് തമിഴ്നാട് സര്ക്കാരുമായി ചര്ച്ച നടത്തുമെന്ന് വ്യക്തമാക്കി ജലവിഭവ വകുപ്പ് മന്ത്രി മോന്സ് ജോസഫ്. മുല്ലപ്പെരിയാറിന്റെ ജലനിലപ്പ് ഉയര്ത്തുമെന്ന തമിഴ്നാട് സര്ക്കാരിന്റെ ബജറ്റ് പ്രഖ്യാപനത്തിന് പിന്നാലെയായിരുന്നു മന്ത്രിയുടെ പ്രതികരണം. മുഖ്യമന്ത്രി തലത്തിലുള്ള ചര്ച്ചയ്ക്കുള്ള ശ്രമം ഉണ്ടാകുമെന്നും അദ്ദേഹം പറഞ്ഞു.കേരളത്തിന്റെ ഭാഗത്തുനിന്നും അതിനുള്ള സാധ്യതകള് തേടും. തമിഴ്നാടിന്റെ പ്രഖ്യാപനം ദൗര്ഭാഗ്യകരമാണെന്നും മന്ത്രി ചൂണ്ടിക്കാട്ടി.
സുരക്ഷാ പരിശോധനകള് നടന്നിട്ടില്ല. സുപ്രീംകോടതിയുടെ നിര്ദ്ദേശപ്രകാരമാണ് 142 അടിയായി ജലനിരപ്പ് നിലനിര്ത്തുന്നത്. ഇതില് മാറ്റം വരുത്താന് കേരളത്തിനോ തമിഴ്നാടിനോ അധികാരമില്ലെന്നും അദ്ദേഹം പറഞ്ഞു. രണ്ട് സംസ്ഥാനങ്ങള്ക്കും സ്വീകാര്യമായ നിലപാട് സുപ്രീംകോടതി പരിശോധിച്ച് തീരുമാനമെടുക്കണം എന്നാണ് കേരളത്തിന്റെ അഭിപ്രായം. പുതിയ ഡാം വേണം എന്നുള്ളത് തന്നെയാണ് സംസ്ഥാനത്തിന്റെ നിലപാടെന്നും അതില് യാതൊരു മാറ്റവുമില്ലെന്നും അദ്ദേഹം വിശദീകരിച്ചു. കേരളത്തിന്റെ താല്പര്യ സംരക്ഷണത്തിന് വേണ്ടിയുള്ള ഉറച്ച നിലപാട് സംസ്ഥാനം സ്വീകരിക്കുമെന്നും മന്ത്രി പറഞ്ഞു.