രാജ്യത്തെ ഏറ്റവും വലിയ ബിസിനസ് ജെറ്റ് ടെർമിനലും രാജ്യത്തെ ആദ്യത്തെ ഗേറ്റ്‌വേയും ആകാനൊരുങ്ങി സിയാൽ
കൊച്ചി: ഇന്ത്യയിലെ ആദ്യ ചാർട്ടർ ഗേറ്റ് വേയായി മാറാൻ ഒരുങ്ങുകയാണ് കൊച്ചി അന്താരാഷ്ട്ര വിമാനത്താവളം. കൊച്ചിൻ ഇന്‍റർനാഷണൽ എയർപോർട്ട് ലിമിറ്റഡിന്‍റെ (സിയാൽ) സ്വകാര്യ/ ചാർട്ടർ വിമാനങ്ങൾക്കായുള്ള ബിസിനസ് ജെറ്റ് ടെർമിനൽ ശനിയാഴ്ച രാവിലെ മുഖ്യമന്ത്രി പിണറായി വിജയൻ ഉദ്ഘാടനം ചെയ്യുന്നതോടെ, രാജ്യത്തെ സ്വകാര്യ ജെറ്റ് ടെർമിനലുകൾ പ്രവർത്തിക്കുന്ന നാല് വിമാനത്താവളങ്ങളിൽ ഒന്നായി സിയാൽ മാറും.
പുതിയ വരുമാന സ്രോതസ്സുകൾ കണ്ടെത്താനും വിജയകരമായി നടപ്പാക്കാനുമുള്ള സിയാലിന്‍റെ വികസന നയത്തിന്‍റെ ഭാഗമായാണ് ബിസിനസ് ജെറ്റ് ടെർമിനലിന്‍റെ നിർമ്മാണം പൂർത്തിയാക്കിയത്.
ഇത് രാജ്യത്തെ ഏറ്റവും വലിയ ബിസിനസ് ജെറ്റ് ടെർമിനലാണ്. 40,000 ചതുരശ്ര അടിയാണ് വിസ്തീർണ്ണം. അന്താരാഷ്ട്ര, ആഭ്യന്തര ബിസിനസ് ജെറ്റ് സേവനങ്ങൾ, ടൂറിസം, ബിസിനസ് കോൺഫറൻസുകൾ എന്നിവ സമന്വയിപ്പിക്കുന്നതിനുള്ള വേദിയായി ചാർട്ടർ ഗേറ്റ് വേ പ്രവർത്തിക്കും. സ്വകാര്യ കാർ പാർക്കിംഗ് സ്ഥലം, ഡ്രൈവ്-ഇൻ പോർച്ച്, ഗംഭീരമായ ലോബി, അഞ്ച് ആഡംബര ലോഞ്ചുകൾ, ഒരു ബിസിനസ്സ് സെന്‍റർ, ചെക്ക്-ഇൻ, ഇമിഗ്രേഷൻ, കസ്റ്റംസ്, ഹെൽത്ത് ആൻഡ് സെക്യൂരിറ്റി സിസ്റ്റങ്ങൾ, ഡ്യൂട്ടി ഫ്രീ ഷോപ്പ്, ഫോറിൻ എക്സ്ചേഞ്ച് കൗണ്ടർ, അത്യാധുനിക വീഡിയോ കോൺഫറൻസിംഗ് സിസ്റ്റം എന്നിവയും ഗേറ്റ് വേയിൽ ഉൾപ്പെടുന്നു. ഇതിനുപുറമെ, വിഐപികൾക്ക് ഉയർന്ന സുരക്ഷ ആവശ്യമാണ്. അതിഥികൾക്കായി ഒരു സേഫ് ഹൗസും സജ്ജീകരിച്ചിട്ടുണ്ട്.
