സത്യപ്രതിജ്ഞാ ലംഘനം; മേയർക്കെതിരെ തിരഞ്ഞെടുപ്പ് കമ്മീഷന് പരാതി

തിരുവനന്തപുരം: മേയർ ആര്യ രാജേന്ദ്രനെതിരെ യൂത്ത് കോൺഗ്രസ് ദേശീയ തിരഞ്ഞെടുപ്പ് കമ്മീഷന് പരാതി നൽകി. സത്യപ്രതിജ്ഞാ ലംഘനം നടത്തിയെന്നാണ് പരാതിയിൽ പറയുന്നത്. ദേശീയ സമിതി അംഗം ജെ.എസ്.അഖിലാണ് പരാതി നൽകിയത്.

തിരുവനന്തപുരം കോർപ്പറേഷനിലെ 295 താൽക്കാലിക തസ്തികകളിൽ പാർട്ടിക്കാരെ ഉൾപ്പെടുത്താനുള്ള പട്ടിക ആവശ്യപ്പെട്ട് മേയർ ആര്യ സി.പി.എം ജില്ലാ സെക്രട്ടറി ആനാവൂർ നാഗപ്പന് അയച്ച കത്ത് പുറത്തുവന്നതിന് പിന്നാലെയാണ് യൂത്ത് കോൺഗ്രസിന്‍റെ നടപടി. കത്ത് പുറത്തുവന്നതിന് പിന്നാലെ മേയർക്കും സി.പി.എമ്മിനുമെതിരെ രൂക്ഷവിമർശനം ഉയർന്നിരുന്നു.

കോർപ്പറേഷനിലേക്ക് യൂത്ത് കോൺഗ്രസും ബി.ജെ.പിയും നടത്തിയ പ്രതിഷേധം സംഘർഷത്തിൽ കലാശിച്ചു. കോർപ്പറേഷനിലെ നിയമനങ്ങൾ പാർട്ടിക്ക് നൽകിയ മേയർ രാജിവയ്ക്കണമെന്ന് യൂത്ത് കോൺഗ്രസ് സംസ്ഥാന പ്രസിഡന്‍റ് ഷാഫി പറമ്പിൽ ആവശ്യപ്പെട്ടു. മേയർ ഏറ്റവും പ്രായം കുറഞ്ഞ അഴിമതിക്കാരിയായി മാറി. കോർപ്പറേഷനിൽ ഇതുവരെ നടത്തിയ എല്ലാ നിയമനങ്ങളും അന്വേഷിക്കണമെന്നും യൂത്ത് കോൺഗ്രസ് സമരവുമായി മുന്നോട്ട് പോകുമെന്നും ഷാഫി പറഞ്ഞു.