ദീപക് ചഹറിന് പരിക്ക്; ദക്ഷിണാഫ്രിക്കയ്ക്കെതിരായ ഏകദിനം നഷ്ടമായേക്കും
ന്യൂഡല്‍ഹി: ഇന്ത്യൻ ക്രിക്കറ്റ് ടീമിനെ വീണ്ടും അസ്വസ്ഥരാക്കി പരിക്ക്. പരിക്ക് കാരണം ദക്ഷിണാഫ്രിക്കയ്ക്കെതിരായ അടുത്ത രണ്ട് ഏകദിനങ്ങൾ മീഡിയം പേസർ ദീപക് ചഹർ കളിക്കില്ലെന്ന് റിപ്പോർട്ട്.
ദക്ഷിണാഫ്രിക്കയ്ക്കെതിരായ ആദ്യ ഏകദിനത്തിന് മുൻപ് നെറ്റ്സിൽ പന്തെറിയുന്നതിനിടെയാണ് ദീപക് ചഹറിന് പരിക്കേറ്റത്. ദീപക്കിന്റെ കണങ്കാലിനാണ് പരിക്കേറ്റത്. എന്നാൽ പരിക്ക് ഗുരുതരമല്ലെന്ന് പിടിഐ റിപ്പോർട്ട് ചെയ്തു. ടി20 ലോകകപ്പ് നടക്കാനിരിക്കെ ദീപക്കിന്റെ കാര്യത്തില്‍ കരുതലെടുക്കുന്നതിന്റെ ഭാഗമായാണ് ഏകദിന പരമ്പരയിൽ നിന്ന് ഒഴിവാക്കുന്നത്.
ബുംറയ്ക്ക് പകരം ടി20 ലോകകപ്പ് ടീമിലേക്ക് പരിഗണിക്കപ്പെടുന്ന ആദ്യ താരങ്ങളിൽ ഒരാളാണ് ദീപക് ചഹർ. മുഹമ്മദ് ഷമിക്ക് ഫിറ്റ്നസ് വീണ്ടെടുക്കാൻ കഴിഞ്ഞില്ലെങ്കിൽ ദീപക് ചഹറിനെ ഓസ്ട്രേലിയയിലേക്ക് അയക്കാനാണ് സാധ്യത.
