ആര്യസമാജം നല്‍കിയ വിവാഹ സര്‍ട്ടിഫിക്കറ്റിന് നിയമപരമായ സാധുത ഇല്ലെന്ന് സുപ്രീം കോടതി
ന്യൂഡൽഹി: ന്യൂഡൽഹി: ആര്യസമാജം നല്‍കിയ വിവാഹ സർട്ടിഫിക്കറ്റിന് നിയമപരമായ അംഗീകാരം നൽകാൻ വിസമ്മതിച്ച് സുപ്രീം കോടതി. ആര്യസമാജത്തിൻറെ പ്രവർത്തനവും അധികാരപരിധിയും വിവാഹ സർട്ടിഫിക്കറ്റുകൾ നൽകുന്നതല്ലെന്ന് ജസ്റ്റിസുമാരായ അജയ് രസ്തോഗി, ബി വി നാഗരത്ന എന്നിവരടങ്ങിയ ബെഞ്ച് വ്യക്തമാക്കി. യോഗ്യരായ അധികാരികൾക്ക് മാത്രമേ വിവാഹ സർട്ടിഫിക്കറ്റ് നൽകാൻ കഴിയൂവെന്ന് കോടതി പറഞ്ഞു.
മധ്യപ്രദേശിലെ പ്രണയവിവാഹവുമായി ബന്ധപ്പെട്ട കേസിലാണ് കോടതിയുടെ നിരീക്ഷണം. മകളെ തട്ടിക്കൊണ്ടുപോയി ബലാത്സംഗം ചെയ്തുവെന്ന് ആരോപിച്ച് പെൺകുട്ടിയുടെ കുടുംബം യുവാവിനെതിരെ എഫ്ഐആർ ഫയൽ ചെയ്തിരുന്നു. എന്നാൽ, പെൺകുട്ടിക്ക് ഭൂരിപക്ഷപ്രായം ലഭിച്ചുവെന്നും സ്വന്തം ഇഷ്ടപ്രകാരമാണ് വിവാഹം കഴിക്കാൻ തീരുമാനിച്ചതെന്നും യുവാവ് ഹർജിയിൽ പറഞ്ഞിരുന്നു.
ആര്യ സമാജ് മന്ദിറിൽ വച്ചാണ് വിവാഹം നടന്നതെന്നും അദ്ദേഹം പറഞ്ഞു. സെൻട്രൽ ഭാരതീയ ആര്യപ്രതിനിധി സഭ നൽകിയ വിവാഹ സർട്ടിഫിക്കറ്റും അദ്ദേഹം ഹാജരാക്കി. എന്നാൽ ഇത് അംഗീകരിക്കാൻ സുപ്രീം കോടതി വിസമ്മതിച്ചു. യോഗ്യരായ അധികാരികൾക്ക് മാത്രമേ വിവാഹ സർട്ടിഫിക്കറ്റ് നൽകാനാവൂ എന്നും ഒറിജിനൽ സർട്ടിഫിക്കറ്റ് കോടതിയിൽ ഹാജരാക്കണമെന്നും സുപ്രീം കോടതി നിർദ്ദേശിച്ചു.
