ശാസ്ത്രീയ ഉപകരണങ്ങളുടെ ഉയര്‍ന്ന ജിഎസ്ടി; കേന്ദ്രം പുനഃപരിശോധിക്കും
ന്യൂഡല്‍ഹി: ശാസ്ത്രീയ ഉപകരണങ്ങളുടെ ചരക്ക് സേവന നികുതി അഞ്ച് ശതമാനത്തിൽ നിന്ന് 18 ശതമാനമായി ഉയർത്തിയ കാര്യം കേന്ദ്രം പുനഃപരിശോധിക്കുമെന്ന് ഇക്കണോമിക് ടൈംസ് റിപ്പോർട്ട് ചെയ്തു. ജൂലൈ 18ന് നടന്ന 47-ാമത് ജിഎസ്ടി കൗൺസിൽ യോഗത്തിലാണ് നിരക്ക് വർധിപ്പിച്ചത്. ഇന്ത്യയുടെ ഗവേഷണ ശേഷിയെ ഇത് പ്രതികൂലമായി ബാധിക്കുമെന്നതിനാൽ ഈ തീരുമാനത്തെ ശാസ്ത്ര സമൂഹം വിമർശിച്ചിരുന്നു.
ഈ വർദ്ധനവിനെ തുടർന്ന് ശാസ്ത്ര സാങ്കേതിക വകുപ്പ്, കൗൺസിൽ ഓഫ് സയന്‍റിഫിക് ആൻഡ് ഇൻഡസ്ട്രിയൽ റിസർച്ച്, പ്രിൻസിപ്പൽ സയന്‍റിഫിക് അഡ്വൈസറുടെ ഓഫീസ് എന്നിവ ഇക്കാര്യം ധനകാര്യ മന്ത്രാലയവുമായി ചർച്ച ചെയ്തു. ശാസ്ത്രീയമായ ഗവേഷണത്തിലെ ഇത്തരം വർദ്ധനവ് ഗുരുതരമായ പ്രത്യാഘാതങ്ങൾ സൃഷ്ടിക്കുമെന്ന് ശാസ്ത്ര വകുപ്പ് ധനമന്ത്രാലയത്തെ അറിയിച്ചിരുന്നു.
ജിഎസ്ടി വർദ്ധനവ് പൂർണ്ണമായും പിൻവലിക്കാൻ കഴിയില്ല. എന്നിരുന്നാലും, ഗവേഷണ സ്ഥാപനങ്ങൾ ലബോറട്ടറി ഉപകരണങ്ങളിലും മറ്റും അധിക സാമ്പത്തിക ഭാരം വഹിക്കേണ്ടിവരാതിരിക്കാൻ നികുതി ഘടനയിൽ ഒരു മാറ്റം കൊണ്ടുവരാൻ സർക്കാർ ശ്രമിക്കുമെന്ന് ഗവേഷണ വകുപ്പ് പ്രതീക്ഷിക്കുന്നു. വിവിധ ശാസ്ത്ര സ്ഥാപനങ്ങൾക്കുള്ള ധനസഹായത്തിനായി വരാനിരിക്കുന്ന ബജറ്റിൽ ഒരു വ്യവസ്ഥയും ഉൾപ്പെടുത്തിയേക്കും.
