ബ്ലാസ്റ്റേഴ്സ് താരങ്ങളെ വിമര്‍ശിച്ച് ഐ എം വിജയന്‍
കൊച്ചി: ഐഎസ്എല്ലിൽ ഹാട്രിക് തോൽവിയേറ്റു വാങ്ങിയതിന് പിന്നാലെ കേരള ബ്ലാസ്റ്റേഴ്സിനെതിരെ രൂക്ഷവിമർശനവുമായി മുൻ ഇന്ത്യൻ ക്യാപ്റ്റൻ ഐ.എം വിജയൻ. എല്ലാവരും ‘അപ്‍‍നാ, അപ്‍‍നാ’ ശൈലിയിലാണ് കളിക്കുന്നത്. പകരക്കാരായി ഇറങ്ങാന്‍ മികച്ച കളിക്കാര്‍ ബ്ലാസ്റ്റേഴ്സിന് ഇല്ലെന്നും ഐ എം വിജയന്‍ പറഞ്ഞു. ഇന്നലെ മുംബൈ സിറ്റി എഫ്സിക്കെതിരായ മത്സരത്തോടെ, ഈ സീസണിൽ 4 മത്സരങ്ങളിൽ നിന്ന് മൂന്ന് തോൽവികളാണ് മഞ്ഞപ്പടയ്ക്ക് നേരിടേണ്ടി വന്നത്.
മുംബൈ സിറ്റി എഫ്സിയോട് എതിരില്ലാത്ത രണ്ട് ഗോളുകൾക്കാണ് കേരള ബ്ലാസ്റ്റേഴ്സ് തോറ്റത്. മെഹത്താബ് സിംഗ്, ഹോർഗെ പെരേര ഡിയാസ് എന്നിവരാണ് മുംബൈയ്ക്കായി സ്കോർ ചെയ്തത്. 21-ാം മിനിറ്റിൽ മെഹത്താബ് സിങ്ങിലൂടെ മുംബൈ ലീഡ് നേടിയപ്പോൾ 31-ാം മിനിറ്റിൽ മുൻ ബ്ലാസ്റ്റേഴ്സ് താരം ഹോർഗെ പെരേര ഡിയാസാണ് ലീഡ് നേടിയത്. രണ്ടാം പകുതിയിൽ ബ്ലാസ്റ്റേഴ്സ് ശക്തമായി ആക്രമിച്ചെങ്കിലും ഗോൾ നേടാൻ കഴിഞ്ഞില്ല. ബ്ലാസ്റ്റേഴ്സിന്‍റെ പ്രതിരോധത്തിലെയും ഫിനിഷിങ്ങിലെയും പിഴവുകൾ ഒരിക്കൽക്കൂടി തെളിയിച്ചിരിക്കുകയാണ് കൊച്ചിയിലെ മത്സരം.
