ദിലീപിനെതിരെ കൂടുതൽ കുറ്റങ്ങൾ ചുമത്തും; തുടരന്വേഷണ റിപ്പോർട്ട് വെള്ളിയാഴ്ച
കൊച്ചി: അപകീർത്തികരമായ ദൃശ്യങ്ങൾ പകർത്താൻ ക്വട്ടേഷൻ നൽകി നടിയെ തട്ടിക്കൊണ്ടുപോയി ഉപദ്രവിച്ച കേസിൽ ക്രൈംബ്രാഞ്ച് വെള്ളിയാഴ്ച തുടരന്വേഷണ റിപ്പോർട്ട് സമർപ്പിക്കും. കേസിൽ തെളിവ് മറച്ചുവച്ചതിനും നശിപ്പിച്ചതിനും നടൻ ദിലീപിനെതിരെ വകുപ്പുകൾ ചുമത്തും. ദിലീപിന്‍റെ സുഹൃത്ത് ശരത്തിനെതിരെയും അങ്കമാലി മജിസ്ട്രേറ്റ് കോടതിയിൽ കുറ്റപത്രം സമർപ്പിക്കും. കേസ് വെള്ളിയാഴ്ച വൈകിട്ട് മൂന്നിന് വീണ്ടും പരിഗണിക്കും.
കേസിലെ പ്രധാന രേഖയായ മെമ്മറി കാർഡ് മൂന്ന് കോടതികളിൽ അനധികൃതമായി തുറന്നെന്ന ഫോറൻസിക് റിപ്പോർട്ടിന്‍റെ പശ്ചാത്തലത്തിൽ തുടരന്വേഷണം പൂർത്തിയാക്കാൻ മൂന്നാഴ്ച കൂടി സമയം വേണമെന്ന് അന്വേഷണ സംഘം ആവശ്യപ്പെട്ടിരുന്നു. ഹൈക്കോടതി അപേക്ഷ തള്ളിയതോടെയാണ് അന്തിമ റിപ്പോർട്ട് തയ്യാറായതെന്ന് അന്വേഷണ സംഘം അറിയിച്ചു. നിരവധി കോപ്പികൾ എടുക്കേണ്ടതിനാൽ റിപ്പോർട്ട് സമർപ്പിക്കാൻ ഡയറക്ടർ ജനറൽ ഓഫ് പ്രോസിക്യൂഷൻ ടി.എ.ഷാജി തിങ്കളാഴ്ച വരെ സമയം ആവശ്യപ്പെട്ടതിനെ തുടർന്നാണ് ജസ്റ്റിസ് കൗസർ എടപ്പാട്ട് വെള്ളിയാഴ്ച വരെ സമയം അനുവദിച്ചത്.
ഒന്നാം പ്രതി എൻ.എസ് സുനിൽ കുമാറും (പൾസർ സുനി) എട്ടാം പ്രതി ദിലീപും തമ്മിൽ അടുത്ത ബന്ധമുണ്ടെന്ന സംവിധായകൻ പി.ബാലചന്ദ്രകുമാറിന്‍റെ വെളിപ്പെടുത്തലിനെ തുടർന്ന് ജനുവരിയിൽ ക്രൈംബ്രാഞ്ച് കൂടുതൽ അന്വേഷണം ആരംഭിച്ചിരുന്നു. ഇത് പൂർത്തിയാക്കാൻ മൂന്ന് തവണ കൂടി നൽകി. ഒടുവിൽ 15ന് തുടരന്വേഷണം പൂർത്തിയാക്കാൻ നിർദേശം നൽകി.
