പരിസ്ഥിതി ലോല മേഖലയുടെ ഉത്തരവ്; കേരളം സുപ്രീം കോടതിയിൽ തിരുത്തൽ ഹർജി നൽകും
തിരുവനന്തപുരം: പരിസ്ഥിതി ലോല മേഖലയുമായി ബന്ധപ്പെട്ട സുപ്രീം കോടതി വിധിക്കെതിരെ തിരുത്തൽ ഹർജി നൽകാനും വിശദമായ പരിശോധന നടത്താനും സംസ്ഥാനത്തിന്റെ നിയമസഭാ സാധ്യതകൾ പരിശോധിക്കാനും മുഖ്യമന്ത്രി പിണറായി വിജയൻ അഡ്വക്കേറ്റ് ജനറലിനെ ചുമതലപ്പെടുത്തി. സംരക്ഷിത വനമേഖലയുടെ ഒരു കിലോമീറ്റർ പരിസ്ഥിതി ലോല മേഖലയാക്കാനുള്ള സുപ്രീം കോടതി ഉത്തരവിന്റെ പ്രത്യാഘാതം ചർച്ച ചെയ്യാൻ വിളിച്ചുചേർത്ത യോഗത്തിലാണ് തീരുമാനം.
ജനവാസ മേഖലകളെ ഒഴിവാക്കി പരിസ്ഥിതി ലോല മേഖല പുനർനിർണയിക്കണമെന്ന് ആവശ്യപ്പെട്ട് സംസ്ഥാന സർക്കാർ നേരത്തെ കേന്ദ്ര സർക്കാരിന് സമർപ്പിച്ച വിജ്ഞാപനം ഒരാഴ്ചയ്ക്കുള്ളിൽ കേന്ദ്ര എംപവേർഡ് കമ്മിറ്റിക്ക് സമർപ്പിക്കണം.
പരിസ്ഥിതി ലോല മേഖലയിൽ നിലവിലുള്ള കെട്ടിടങ്ങളുടെയും നിർമ്മാണ പ്രവർത്തനങ്ങളുടെയും വിശദാംശങ്ങൾ സുപ്രീം കോടതി നിശ്ചയിച്ച സമയപരിധിക്കുള്ളിൽ സമർപ്പിക്കണമെന്ന് മുഖ്യമന്ത്രി നിർദ്ദേശിച്ചു. പ്രിൻസിപ്പൽ ചീഫ് കൺസർവേറ്റർ ഓഫ് ഫോറസ്റ്റിനെയാണ് ഇതിന് ചുമതലപ്പെടുത്തിയിരിക്കുന്നത്.
