അവയവദാനത്തെ പ്രോത്സാഹിപ്പിക്കുന്ന കുറിപ്പുമായി പി ജയരാജന്‍
കണ്ണൂര്‍: അവയവദാനത്തിന്‍റെയും രക്തദാനത്തിന്‍റെയും പ്രാധാന്യം ഉയർത്തിക്കാട്ടി കുറിപ്പുമായി സി.പി.ഐ(എം) നേതാവ് പി.ജയരാജൻ. അന്താരാഷ്ട്ര അവയവദാന ദിനത്തോടനുബന്ധിച്ചാണ് ജയരാജൻ ഫേസ്ബുക്കിൽ കുറിപ്പ് പങ്കുവച്ചത്. തനിക്ക് നേരെയുണ്ടായ സംഘപരിവാർ ആക്രമണത്തിൽ മാരകമായി പരിക്കേറ്റപ്പോൾ എറണാകുളത്തെ ചുമട്ടുതൊഴിലാളികൾ രക്തം നൽകിയെന്ന് അദ്ദേഹം പറഞ്ഞു.
മറ്റൊരു ജീവന് വെളിച്ചം നൽകാൻ കഴിയുന്ന അവയവങ്ങൾ ഉപയോഗശൂന്യമായ രീതിയിൽ മരണാനന്തരം പലരും നശിപ്പിക്കുകയാണെന്ന് അദ്ദേഹം പറഞ്ഞു. കണ്ണുകൾ, കരൾ, ഹൃദയം, വൃക്കകൾ തുടങ്ങി 30 ഓളം അവയവങ്ങൾ ദാനം ചെയ്യാൻ കഴിയുമെന്നും അവയവ ദാനത്തെ എല്ലാവരും പ്രോത്സാഹിപ്പിക്കണമെന്നും അദ്ദേഹം പറഞ്ഞു.
