ഫരീദാബാദിലെ അമൃത ആശുപത്രി ഉദ്ഘാടനം ചെയ്ത് പ്രധാനമന്ത്രി
ഹരിയാന: രാജ്യത്തെ ഏറ്റവും വലിയ സ്വകാര്യ ആശുപത്രി പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തു. അമൃതാനന്ദമയി മഠത്തിന്‍റെ ഉടമസ്ഥതയിലുള്ളതാണ് ആശുപത്രി. 2,600 കിടക്കകളുള്ള ഈ സൂപ്പർ സ്പെഷ്യാലിറ്റി ആശുപത്രി ഹരിയാനയിലെ ഫരീദാബാദിലാണ് സ്ഥിതി ചെയ്യുന്നത്.
ലാബ് പൂർണ്ണമായും ഓട്ടോമേറ്റഡ് ആകാൻ സജ്ജമാണ്. 130 ഏക്കർ കാമ്പസിൽ നിർമ്മിച്ച ആശുപത്രി ദേശീയ തലത്തിൽ (എൻസിആർ) ആരോഗ്യ അടിസ്ഥാന സൗകര്യങ്ങൾക്ക് വലിയ ഉത്തേജനം നൽകുമെന്ന് ആരോഗ്യ മന്ത്രാലയം പ്രസ്താവനയിൽ പറഞ്ഞു.
സ്നേഹത്തിന്‍റെയും ത്യാഗത്തിന്‍റെയും പ്രതിരൂപമാണ് അമ്മയെന്നും എല്ലാവർക്കും പ്രചോദനമാണെന്നും പ്രധാനമന്ത്രി പറഞ്ഞു.
ആരോഗ്യപരിപാലനവും ആത്മീയതയും പരസ്പരം ബന്ധപ്പെട്ടിരിക്കുന്ന രാജ്യമാണ് ഇന്ത്യയെന്ന് ചടങ്ങിൽ സംസാരിച്ച പ്രധാനമന്ത്രി മോദി പറഞ്ഞു. സാങ്കേതികവിദ്യയും ആധുനികവൽക്കരണവും സംയോജിപ്പിച്ചാൽ ആരോഗ്യമേഖലയിൽ രാജ്യത്തിന്‍റെ പുരോഗതി കൈവരിക്കുമെന്നും ആരോഗ്യ, വിദ്യാഭ്യാസ മേഖലകളെ ഒരു മിഷൻ മോഡാക്കി മാറ്റാൻ സർക്കാരുകളും മറ്റുള്ളവരും മുന്നോട്ട് വരുന്നുവെന്ന് ഉറപ്പാക്കാൻ ഇന്ത്യ ശ്രമിക്കുകയാണെന്നും അദ്ദേഹം പറഞ്ഞു.
