‘കെജിഎഫ് 2’നു ശേഷം ‘കാന്താരാ’ കേരളത്തിലെത്തിക്കാന്‍ പൃഥ്വിരാജ്
അഭിനയം, സംവിധാനം, നിര്‍മ്മാണം എന്നീ മേഖലകളിലെ പോലെ തന്നെ ചലച്ചിത്ര വിതരണത്തിലും പൃഥ്വിരാജ് സജീവമാണ്. കെ.ജി.എഫ് 2 പോലുള്ള നിരവധി പ്രമുഖ ഭാഷാ ഇതര ചിത്രങ്ങൾ പൃഥ്വിരാജ് പ്രൊഡക്ഷൻസ് കേരളത്തിൽ വിതരണം ചെയ്തിട്ടുണ്ട്. സമീപകാലത്ത് ഏറെ ശ്രദ്ധ നേടിയ ഒരു കന്നഡ ചിത്രം കൂടി കേരളത്തിൽ റിലീസ് ചെയ്യാനുള്ള തയ്യാറെടുപ്പിലാണ് അദ്ദേഹം.
റിഷഭ് ഷെട്ടി തിരക്കഥയെഴുതി സംവിധാനം ചെയ്യുന്ന ‘കാന്താരാ’ എന്ന ചിത്രമാണ് പൃഥ്വിരാജ് കേരളത്തിൽ എത്തിക്കുന്നത്. കന്നഡ പതിപ്പ് കണ്ടതിന് ശേഷം സിനിമ കേരളത്തിലേക്ക് കൊണ്ടുവരണമെന്നാണ് തനിക്ക് തോന്നിയതെന്നും ഇവിടെ എത്തുമ്പോൾ ചിത്രം കാണാതെ പോകരുതെന്നും പൃഥ്വിരാജ് സോഷ്യൽ മീഡിയയിൽ കുറിച്ചു.
“സിനിമാറ്റിക് ആയ ഗംഭീരമായ ഒരു നേട്ടമാണ് കാന്താരാ. ക്യാമറയ്ക്ക് മുന്നിലും പിറകിലും ഒരേപോലെ പ്രതിഭാവിലാസം കാട്ടുന്നയാളാണ് റിഷഭ് ഷെട്ടി. ഹൊംബാളെ ഫിലിംസ്, എന്തൊക്കെ തരത്തിലുള്ള ഉള്ളടക്കമാണ് നിങ്ങള്‍ നിര്‍മ്മിച്ചുകൊണ്ടിരിക്കുന്നത്? വഴി കാട്ടുന്നതിന് നന്ദി. അതിഗംഭീരമായ ആ അവസാന 20 മിനിറ്റിന് കാത്തിരിക്കുക.” പൃഥ്വിരാജ് ട്വീറ്റ് ചെയ്‍തു. മലയാളം പതിപ്പിന്‍റെ റിലീസ് തിയതി ഇതുവരെ പ്രഖ്യാപിച്ചിട്ടില്ല. കന്നഡ പതിപ്പ് സെപ്റ്റംബർ 30നാണ് പുറത്തിറങ്ങിയത്.
