റെഡ്ബുൾ സഹസ്ഥാപകൻ ഡിട്രിച് മറ്റെഷിറ്റ്സ് വിടവാങ്ങി
വിയന: ഓസ്ട്രിയൻ കോടീശ്വരനും ഊർജപാനീയ കമ്പനിയായ റെഡ്ബുൾ സഹസ്ഥാപകനും, റെഡ്ബുൾ ഫോർമുല വൺ റേസിംഗ് ടീം ഉടമയുമായ ഡിട്രിച് മറ്റെഷിറ്റ്സ് (78) അന്തരിച്ചു. ഏകദേശം 2700 കോടി ഡോളർ ആസ്തിയുള്ള ഇദ്ദേഹം ഓസ്ട്രിയയിലെ ഏറ്റവും വലിയ ധനികനാണ്.
1984-ൽ മറ്റെഷിറ്റ്സും തായ് നിക്ഷേപകനായ ചെലിയോ യോവിദ്യയും ചേർന്നാണ് റെഡ്ബുൾ സ്ഥാപിച്ചത്. റെഡ്ബുൾ കമ്പനി ലോകമെമ്പാടുമുള്ള 172 രാജ്യങ്ങളിൽ എനർജി ഡ്രിങ്കുകൾ വിൽക്കുന്നു. വിവിധ ഇനങ്ങളിൽ ടീമുകളെയും അത്ലറ്റുകളെയും സ്പോൺസർ ചെയ്ത് സ്പോർട്സ് ഉപയോഗിച്ച് വിപണി വിഹിതം കൂട്ടാൻ റെഡ്ബുള്ളിനെ പ്രാപ്തമാക്കിയത് മറ്റെഷിറ്റ്സിന്‍റെ മികവാണ്.
