നാവിക സേനയ്‌ക്കൊപ്പം ദേശീയ പതാകയേന്തി സൽമാൻ ഖാൻ
വിശാഖപട്ടണം: ബോളിവുഡ് സൂപ്പർ താരം സൽമാൻ ഖാൻ വിശാഖപട്ടണത്തെ നാവിക ആസ്ഥാനത്ത് ഇന്ത്യൻ നാവിക സേനാംഗങ്ങൾക്കൊപ്പം ഒരു ദിവസം ചെലവഴിച്ചു. സൈനികരുമായി സംസാരിക്കുമ്പോൾ രാജ്യസ്നേഹം തന്റെ ശരീരമാകെ പടരുകയാണെന്ന് സൽമാൻ ഖാൻ പറഞ്ഞു.
2014ൽ ഗോവയിലും നാവികസേനയ്‌ക്കൊപ്പം താൻ പങ്കുചേർന്നിട്ടുണ്ടെന്ന് സൽമാൻ ഖാൻ പറഞ്ഞു. സൈനികരിൽ നിന്നും ദേശീയ പതാക ഏറ്റുവാങ്ങി ആവേശത്തോടെ വീശിയ സൽമാൻ ദേശഭക്തിഗാനങ്ങൾ പാടാനും തന്റെ ചിത്രങ്ങളിലെ ഗാനങ്ങൾക്കൊപ്പം ചുവടുവെയ്‌ക്കാനും മടിച്ചില്ല.
കടൽ എപ്പോഴും സുരക്ഷിതമായിരിക്കണം എന്നതാണ് സൈനികരുടെ ചിന്തയും ശ്രദ്ധയും. കപ്പലിനുള്ളിലെ വിവിധ സംവിധാനങ്ങൾ തന്നെ പരിചയപ്പെടുത്തിയെന്നും ഒരു സൈനികന്‍റെ ദിനചര്യയെക്കുറിച്ചും പരിശീലന രീതികളെക്കുറിച്ചും വിശദമായി ചോദിച്ചതായും സൽമാൻ ഖാൻ പറഞ്ഞു.
