അയ്യപ്പ ഭക്തർക്ക് നൽകിയ ഭക്ഷണത്തിൽ ഒച്ച്; മുളന്തുരുത്തിയിൽ ഹോട്ടൽ അടപ്പിച്ചു
മുളന്തുരുത്തി: മുളന്തുരുത്തിയിലെ വെജിറ്റേറിയൻ ഹോട്ടലിൽ കയറിയ അയ്യപ്പ ഭക്തർക്ക് നൽകിയ ഭക്ഷണത്തിൽ ഒച്ചിനെ കണ്ടെത്തി.
ശബരിമലയിലേക്കുള്ള യാത്രാമധ്യേ കണ്ണൂരിൽ നിന്നുള്ള ഒരു സംഘമാണ് മുളന്തുരുത്തി-ചോറ്റാനിക്കര റോഡിലെ ശരവണഭവൻ വെജിറ്റേറിയൻ ഹോട്ടലിൽ കയറിയത്. സംഘത്തിലൊരാൾ പൂരി മസാല ഓർഡർ ചെയ്തു. മസാലയിലാണ് ഒച്ചിനെ കണ്ടത്. ഒച്ചിനെ കണ്ടതോടെ ഹോട്ടൽ ജീവനക്കാരോട് പരാതിപ്പെട്ടു. എന്നാൽ ജീവനക്കാർ മോശമായി പെരുമാറുകയായിരുന്നു.
സംഭവത്തെക്കുറിച്ച് പൊലീസിനെയും ആരോഗ്യവകുപ്പിനെയും അറിയിച്ചു. പൊലീസും ആരോഗ്യവകുപ്പ് ജീവനക്കാരും ഉടൻ തന്നെ സ്ഥലത്തെത്തി ഹോട്ടൽ അടപ്പിച്ചു.
