തമിഴ് സംവിധായകൻ മണി നാഗരാജ് അന്തരിച്ചു
ചെന്നൈ: തമിഴ് സംവിധായകൻ മണി നാഗരാജ് ഹൃദയാഘാതത്തെ തുടർന്ന് അന്തരിച്ചു. വ്യാഴാഴ്ച രാവിലെയാണ് സംഭവം. പുതുതായി സംവിധാനം ചെയ്ത ‘വാസുവിൻ ഗർഭിണികൾ’ എന്ന ചിത്രത്തിന്റെ റിലീസിനായി കാത്തിരിക്കുന്നതിനിടയിലാണ് മരണം സംഭവിച്ചത്.
ഗൗതം വാസുദേവ് മേനോന്‍റെ സംവിധാന സഹായിയായിരുന്നു മണി നാഗരാജ്. 2016-ൽ ജി.വി. പ്രകാശ് നായകനായി അഭിനയിച്ച പെൻസിൽ എന്ന ചിത്രം സംവിധാനം ചെയ്താണ് അദ്ദേഹം സ്വതന്ത്ര സംവിധായകനായി അരങ്ങേറ്റം കുറിച്ചത്. വാസുവിൻ ഗർഭിണികളാണ് രണ്ടാമത്തെ ചിത്രം. മലയാള ചിത്രമായ സക്കറിയയുടെ ഗർഭിണികളുടെ റീമേക്ക് ആണിത്.
നീയാ നാനാ ഗോപിനാഥ്, സീത, വനിത വിജയകുമാർ, അനിഖ സുരേന്ദ്രൻ എന്നിവർ പ്രധാനവേഷത്തിലെത്തുന്ന ചിത്രത്തിന്റെ പോസ്റ്റ് പ്രൊഡക്ഷൻ ജോലികളിലായിരുന്നു മണി നാഗരാജ്. തമിഴ് ചലച്ചിത്രമേഖലയിലെ നിരവധി പേർ അദ്ദേഹത്തിന്റെ മരണത്തിൽ അനുശോചിച്ചു.
