കൊവിഡ് വ്യാപനം; പാര്‍ട്ടി കോണ്‍ഗ്രസ് നടക്കാനിരിക്കെ ചൈന വീണ്ടും ലോക്ഡൗണിലേക്ക്
ബീജിംഗ്: അടുത്തയാഴ്ച നടക്കാനിരിക്കുന്ന കമ്യൂണിസ്റ്റ് പാർട്ടി യോഗത്തിന് മുന്നോടിയായി ചൈനയിൽ വീണ്ടും ലോക്ക്ഡൗൺ ഏർപ്പെടുത്തി. ഒരാഴ്ച നീണ്ടുനിൽക്കുന്ന അവധിക്കാലത്ത് പ്രതിദിന കോവിഡ് കേസുകളുടെ എണ്ണം മൂന്നിരട്ടിയായതിനെ തുടർന്നാണ് ചൈനയിൽ വീണ്ടും ലോക്ക്ഡൗൺ പ്രഖ്യാപിച്ചത്. കഴിഞ്ഞ ദിവസം ഷാങ്‌സി പ്രവിശ്യയിൽ നടത്തിയ പരിശോധനയിൽ പുതിയ പോസിറ്റീവ് കേസുകൾ കണ്ടെത്തിയതിനെ തുടർന്നാണ് ലോക്ക്ഡൗൺ ഏർപ്പെടുത്തിയതെന്നാണ് റിപ്പോർട്ട്.
അടുത്തുള്ള ഇന്നർ മംഗോളിയൻ തലസ്ഥാനമായ ഹോഹോട്ടിലേക്കുള്ള പ്രവേശനം നാളെ മുതൽ നിരോധിച്ചു. ഏകദേശം 12 ദിവസത്തിനുള്ളിൽ 2000 ലധികം കോവിഡ് കേസുകൾ നഗരത്തിൽ രേഖപ്പെടുത്തി. കൊവിഡ് രോഗവ്യാപനം തടയാൻ ഇപ്പോഴും കടുത്ത നടപടികൾ സ്വീകരിക്കുന്ന ചുരുക്കം ചില രാജ്യങ്ങളിലൊന്നാണ് ചൈന. അഞ്ച് വർഷത്തിലൊരിക്കൽ നടക്കുന്ന ചൈനീസ് കമ്യൂണിസ്റ്റ് പാർട്ടി കോൺഗ്രസ് ഞായറാഴ്ച ആരംഭിക്കും. ഈ ഘട്ടത്തിൽ രാജ്യത്ത് കൊവിഡ് വ്യാപനം കുറയ്ക്കുകയാണ് ലക്ഷ്യം. ഒക്ടോബർ 1ന് ആരംഭിച്ച വാർഷിക ദേശീയ ദിന അവധിയിൽ, നഗരങ്ങളിൽ നിന്നും പ്രവിശ്യകളിൽ നിന്നും ആളുകൾ യാത്ര ചെയ്യുന്നതിൽ നിന്ന് സർക്കാർ നിരുത്സാഹപ്പെടുത്തിയിരുന്നു. എന്നിട്ടും പുതിയ പ്രതിദിന കേസുകളുടെ എണ്ണം 600ൽ നിന്ന് 1800 ആയി വർദ്ധിക്കുകയാണെന്ന് റിപ്പോർട്ടുകൾ പറയുന്നു.
കമ്യൂണിസ്റ്റ് ഭരണകൂടത്തിന്‍റെ ‘സീറോ കോവിഡ്’ സമീപനം രാജ്യത്തിന് വലിയ സാമ്പത്തിക ബാധ്യതയാണ് ഉണ്ടാക്കിയിരിക്കുന്നത്. സർക്കാരിന്റെ സീറോ-കോവിഡ് നിയന്ത്രണങ്ങൾ ചെറുകിട ബിസിനസുകളെയും താൽക്കാലിക തൊഴിലാളികളെയും, പ്രത്യേകിച്ച് പ്രതികൂലമായി ബാധിച്ചു. രാജ്യത്തുടനീളം പകർച്ചവ്യാധികൾ റിപ്പോർട്ട് ചെയ്യപ്പെട്ടിട്ടുണ്ടെങ്കിലും, ഇന്നർ മംഗോളിയയിലും വിദൂര പടിഞ്ഞാറൻ സിൻജിയാങ് മേഖലയിലുമാണ് ഏറ്റവും കൂടുതൽ വ്യാപനം റിപ്പോർട്ട് ചെയ്തിരിക്കുന്നത്. നീണ്ട ലോക്ക്ഡൗൺ ഏർപ്പെടുത്തിയതിനാൽ തലസ്ഥാനമായ ബെയ്ജിംഗിലെ കേസുകളുടെ എണ്ണം വളരെ കുറവാണ്. എന്നിരുന്നാലും, ഇവിടെയും പുതിയ കേസുകൾ റിപ്പോർട്ട് ചെയ്യപ്പെടുന്നുണ്ടെന്നാണ് റിപ്പോർട്ടുകൾ.
