കെജിഎഫിലെ ഗാനങ്ങളുടെ ഉപയോഗം; രാഹുൽ ഗാന്ധിക്കെതിരെ കോടതിയലക്ഷ്യത്തിന് നോട്ടീസ്
ബെംഗളൂരു: കെജിഎഫ് 2ലെ ഗാനങ്ങൾ അനുവാദമില്ലാതെ ഭാരത് ജോഡോ യാത്രയുടെ വീഡിയോയിൽ ഉപയോഗിച്ചതിന് കോൺഗ്രസ് നേതാവ് രാഹുൽ ഗാന്ധിക്ക് കർണാടക ഹൈക്കോടതി കോടതിയലക്ഷ്യ നോട്ടീസ് അയച്ചു. വീഡിയോ നീക്കം ചെയ്യാനുള്ള കോടതി ഉത്തരവ് പാലിച്ചില്ലെന്ന് കാണിച്ച് എംആർടി മ്യൂസിക്കാണ് പരാതി നൽകിയത്.
എ.ഐ.സി.സി ജനറൽ സെക്രട്ടറി ജയറാം രമേശ്, പാർട്ടിയുടെ സോഷ്യൽ മീഡിയ വിഭാഗത്തിന്‍റെ ചുമതലയുള്ള സുപ്രിയ ശ്രീനാട്ടെ എന്നിവർക്കും നോട്ടീസ് അയച്ചിട്ടുണ്ട്.
അനുമതിയില്ലാതെ പാട്ടുകൾ ഉപയോഗിച്ചതിനെതിരെ എംആർടി മ്യൂസിക് നൽകിയ പരാതിയിൽ ബെംഗളൂരു അഡീഷണൽ സിറ്റി സിവിൽ കോടതി കോൺഗ്രസിന്‍റെ ട്വിറ്റർ അക്കൗണ്ടിന് താൽക്കാലിക വിലക്ക് ഏർപ്പെടുത്തിയിരുന്നു. ഇതിനെതിരെ കോൺഗ്രസ് നൽകിയ ഹർജി പരിഗണിച്ച ഹൈക്കോടതി വീഡിയോകൾ നീക്കം ചെയ്യണമെന്ന വ്യവസ്ഥയിലാണ് വിലക്ക് നീക്കിയത്.
