ട്രാഫിക് നിയമലംഘനങ്ങൾ വർധിക്കുന്നു; നടപടികൾ കർശനമാക്കി കുവൈറ്റ്
കുവൈത്ത്: കുവൈറ്റിൽ കഴിഞ്ഞ ഒരാഴ്ചയ്ക്കിടെ 31,000 ത്തിലധികം ട്രാഫിക് നിയമ ലംഘനങ്ങളാണ് റിപ്പോർട്ട് ചെയ്തത്. ആഭ്യന്തര മന്ത്രാലയത്തിലെ ഓപ്പറേഷൻസ് ആൻഡ് ട്രാഫിക് അഫയേഴ്സ് അസിസ്റ്റന്‍റ് അണ്ടർസെക്രട്ടറി മേജർ ജനറൽ ജമാൽ അൽ സയേഗിന്‍റെ മേൽനോട്ടത്തിൽ നടത്തിയ പരിശോധനയിലാണ് നിയമലംഘനങ്ങൾ കണ്ടെത്തിയത്.
കഴിഞ്ഞ ഒരാഴ്ചയായി ട്രാഫിക് വിഭാഗം ഇത്തരത്തിലുള്ള നിരവധി സുരക്ഷാ പരിശോധനകൾ നടത്തുന്നുണ്ട്. പരിശോധനയ്ക്കിടെ അശ്രദ്ധമായി വാഹനം ഓടിച്ചിരുന്ന 40 ഡ്രൈവർമാരെ സംഘം പിടികൂടി. 96 വാഹനങ്ങൾ തടങ്കൽ ഗാരേജിലേക്ക് റഫർ ചെയ്തു.
ഡ്രൈവിംഗ് ലൈസൻസില്ലാതെ വാഹനമോടിച്ചതിന് അറസ്റ്റിലായ പ്രായപൂർത്തിയാകാത്ത 77 പേരെ ജുവനൈൽ പ്രോസിക്യൂഷനിലേയ്ക്ക് അയച്ചു. വാഹനമോടിക്കുമ്പോൾ മൊബൈൽ ഫോൺ ഉപയോഗിച്ച 270 പേർക്കെതിരെയും സീറ്റ് ബെൽറ്റ് ധരിക്കാത്തതിന് 293 പേർക്കെതിരെയും നിയമനടപടി സ്വീകരിച്ചു.
