വിഴിഞ്ഞം സമരം; പിന്തിരിപ്പിക്കാനുള്ള ശ്രമത്തിൽ വീഴരുതെന്ന സർക്കുലറുമായി അതിരൂപത
തിരുവനന്തപുരം: വിഴിഞ്ഞം തുറമുഖ സമരത്തിൽ നിലപാട് കടുപ്പിച്ച് ലത്തീൻ അതിരൂപത. സമരത്തിന്റെ പ്രാധാന്യം ചൂണ്ടിക്കാണിച്ച് ആർച്ച് ബിഷപ്പ് തോമസ് ജെ നെറ്റോയുടെ സർക്കുലർ ഇന്ന് കുർബാനയ്ക്കിടയിൽ പള്ളികളിൽ വായിക്കും. സമരവുമായി മുന്നോട്ട് പോകണമെന്നും പിന്തിരിപ്പിക്കാനും വിഭജിക്കാനുമുള്ള ശ്രമങ്ങൾക്ക് ഇരയാകരുതെന്നും സർക്കുലറിൽ പറയുന്നു.
അതേസമയം, വിഷയം ചർച്ച ചെയ്യാൻ മന്ത്രിമാരായ വി അബ്ദുറഹ്മാനും ആന്റണി രാജുവും ഇന്ന് യോഗം ചേരും. സമരസമിതി നേതാക്കളുമായി മന്ത്രിമാർ പിന്നീട് കൂടിക്കാഴ്ച നടത്തിയേക്കും. എത്രയും വേഗം സമവായത്തിലെത്താൻ മുഖ്യമന്ത്രി മന്ത്രിമാർക്ക് നിർദ്ദേശം നൽകിയിട്ടുണ്ട്. തുറമുഖ സമരത്തിന്റെ പതിമൂന്നാം ദിവസം ശാന്തിപുരം, പുതുക്കുരുച്ചി, തഴമ്പള്ളി, പൂതുറ ഇടവകകളുടെ നേതൃത്വത്തിൽ റാലിയും ഉപരോധവും നടത്തും.
അതേസമയം, തിരുവനന്തപുരത്ത് വിഴിഞ്ഞം തുറമുഖത്തിന്റെ നിർമ്മാണത്തിന്റെ പ്രത്യാഘാതങ്ങളെക്കുറിച്ചും തീരശോഷണത്തെക്കുറിച്ചും ശാസ്ത്രീയവും സുതാര്യവുമായ പഠനം നടത്തണമെന്ന് കേരള ലത്തീൻ കത്തോലിക്ക മെത്രാൻ സമിതി ആവശ്യപ്പെട്ടു. സമീപകാലത്ത് കോവളം, ശംഖുമുഖം, പൂന്തുറ, വലിയതുറ തീരങ്ങളിൽ ഉണ്ടായ നാശനഷ്ടങ്ങൾക്ക് കാരണം തുറമുഖത്തിന്റെ നിർമ്മാണമാണ്. തിരുവനന്തപുരം അതിരൂപതയുടെ നേതൃത്വത്തിൽ നടക്കുന്ന സമരങ്ങൾക്ക് ലത്തീൻ സഭയുടെ പൂർണ്ണ പിന്തുണയുണ്ടെന്നും യോഗം വ്യക്തമാക്കി.
