കമൽഹാസൻ ചിത്രം ‘ഇന്ത്യൻ 2’ൽ യുവരാജ് സിംഗിന്റെ പിതാവും

ദക്ഷിണേന്ത്യൻ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന ചിത്രങ്ങളിലൊന്നാണ് ‘ഇന്ത്യൻ 2’. കമൽ ഹാസൻ-ശങ്കർ കൂട്ടുകെട്ടിൽ വരുന്ന ചിത്രത്തെക്കുറിച്ചുള്ള എല്ലാ അപ്ഡേറ്റുകളും സിനിമാപ്രേമികൾ ഏറെ ആകാംക്ഷയോടെയാണ് ഏറ്റെടുക്കുന്നത്.

ഇപ്പോൾ ചിത്രത്തിലെ അഭിനേതാക്കളെയും അണിയറ പ്രവർത്തകരെയും കുറിച്ചുള്ള വിവരങ്ങൾ ഒന്നൊന്നായി വന്നുകൊണ്ടിരിക്കുകയാണ്. മുൻ ഇന്ത്യൻ ക്രിക്കറ്റ് താരവും നടനുമായ യോ​ഗ് രാജ് സിംഗ് ചിത്രത്തിലുണ്ടെന്നാണ് ഇപ്പോൾ പുറത്തുവരുന്ന വിവരം. 

മുൻ ഇന്ത്യൻ ക്രിക്കറ്റ് താരം യുവരാജ് സിംഗിന്റെ പിതാവാണ് യോ​ഗ് രാജ് സിംഗ്.  ‘ഇന്ത്യൻ 2’ ന്‍റെ ഭാഗമാകുമെന്ന് അദ്ദേഹം തന്നെ ഇൻസ്റ്റാഗ്രാമിലൂടെ അറിയിച്ചിരുന്നു. “എന്നെ കൂടുതൽ സ്മാർട്ടാക്കിയ മേക്കപ്പ് ആർട്ടിസ്റ്റുകൾക്ക് നന്ദി പറയുന്നു. ഇന്ത്യൻ 2ന് പഞ്ചാബിന്റെ സിംഹം തയ്യാറായിക്കഴിഞ്ഞു” യോ​ഗ് രാജ് ഇൻസ്റ്റാഗ്രാമിൽ കുറിച്ചു. ക്യാമറയ്ക്ക് പിന്നിൽ പ്രവർത്തിക്കുന്ന എല്ലാവരോടും തനിക്ക് വലിയ ബഹുമാനമുണ്ടെന്നും യോ​ഗ് രാജ് കൂട്ടിച്ചേർത്തു.