സൊമാറ്റോ സഹസ്ഥാപകന്‍ മോഹിത് ഗുപ്ത രാജിവെച്ചു
ന്യൂഡല്‍ഹി: സൊമാറ്റോ സഹസ്ഥാപകൻ മോഹിത് ഗുപ്ത രാജിവച്ചു. മോഹിത് ഗുപ്ത സൊമാറ്റോയിൽ നിന്ന് പുറത്തുപോകുന്ന മൂന്നാമത്തെ സഹസ്ഥാപകനാണ്. പുതിയ സംരംഭങ്ങളുടെ തലവനായ രാഹുൽ ഗഞ്ചൂ ഈ ആഴ്ച ആദ്യം രാജിവച്ചിരുന്നു. ഈ മാസമാദ്യം സിദ്ധാർത്ഥ് ജാവർ ഇന്‍റർസിറ്റി ലെജൻഡ്സ് സർവീസസ് വൈസ് പ്രസിഡന്‍റ്, ഹെഡ് എന്നീ സ്ഥാനങ്ങളിൽ നിന്ന് രാജിവച്ചിരുന്നു.
2021 ജൂലൈയിൽ, ഇനീഷ്യൽ പബ്ലിക് ഓഫറിംഗ് (ഐപിഒ) കഴിഞ്ഞ് രണ്ട് മാസത്തിന് ശേഷം, സഹസ്ഥാപകൻ ഗൗരവ് ഗുപ്ത സൊമാറ്റോയിൽ നിന്ന് പുറത്തായി. 2018ൽ സൊമാറ്റോയുടെ പ്രാരംഭ സഹസ്ഥാപകൻ പങ്കജ് ഛദ്ദ കമ്പനി വിട്ടു. ഇതിന് ശേഷം, ഗൗരവ് ഗുപ്തയും മോഹിത് ഗുപ്തയും 2019 ലും 2020 ലും സഹസ്ഥാപകരായി ഉയർന്നുവന്നു.
സൊമാറ്റോയുടെ ഫുഡ് ഡെലിവറി യൂണിറ്റിന്‍റെ ചീഫ് എക്സിക്യൂട്ടീവ്, പുതിയ സംരംഭങ്ങളുടെ തലവൻ എന്നിവയുൾപ്പെടെ ഗുപ്ത വിവിധ പദവികൾ വഹിച്ചിട്ടുണ്ട്. 2018 ൽ സൊമാറ്റോയിൽ ചേരുന്നതിന് മുമ്പ്, ട്രാവൽ ബുക്കിംഗ് പ്ലാറ്റ്‌ഫോമായ മേക്ക് മൈ ട്രിപ്പിന്‍റെ ചീഫ് ഓപ്പറേറ്റിംഗ് ഓഫീസറായിരുന്നു ഗുപ്ത. നേരത്തെ പെപ്സികോ ഇന്ത്യയുടെ മാർക്കറ്റിംഗ് വൈസ് പ്രസിഡന്‍റായും സേവനമനുഷ്ഠിച്ചിട്ടുണ്ട്.
