കള്ളാടി മണ്ണിടിച്ചിൽ ; മരണം ഏഴായി

വയനാട് : കള്ളാടി മണ്ണിടിച്ചിൽ ദുരന്തത്തിൽ മരിച്ചവരുടെ എണ്ണം ഏഴായി. വ്യാഴാഴ്ച രാവിലെ നടത്തിയ തിരച്ചിലിലാണ് നാല് പേരുടെ മൃതദേഹങ്ങൾ കൂടി കണ്ടെത്തിയത്.

കണ്ടെത്തിയവരിൽ ബിഹാർ സ്വദേശി മുഹമ്മദ് ഇമ്രാൻ, ഹിമാചൽപ്രദേശ് സ്വദേശി രാഹുൽ ശർമ്മ, ഉത്തർപ്രദേശ് സ്വദേശി അസറുദ്ദീൻ അൻസാരി എന്നിവരെ തിരിച്ചറിഞ്ഞിട്ടുണ്ട്. മുഹമ്മദ് ഇമ്രാൻ എക്സ്കവേറ്റർ ഓപ്പറേറ്ററായിരുന്നു. രാഹുൽ ശർമ്മ എൻജിനീയറായും അസറുദ്ദീൻ അൻസാരി കരാർ കമ്പനിയിലെ സർവേയറായും ജോലി ചെയ്തുവരികയായിരുന്നു.

ദുരന്തത്തിന്റെ മൂന്നാം ദിവസവും തിരച്ചിൽ തുടരുകയാണ്. ഫയർഫോഴ്സിനൊപ്പം 20 അംഗ എൻഡിആർഎഫ് സംഘം പുഴ കേന്ദ്രീകരിച്ച് കൂടുതൽ പരിശോധന നടത്തും. കണ്ടെത്തിയ മൃതദേഹങ്ങൾ പോസ്റ്റുമോർട്ടത്തിന് ശേഷം കോഴിക്കോട് മെഡിക്കൽ കോളേജിലേക്ക് മാറ്റി എംബാം നടപടികൾ പൂർത്തിയാക്കും.